Անկարող կառավարությունն ու Արցախբանկի հանցավոր անգործությունը

«Տոնուս» ՍՊԸ-ի կողմից Դավիթաշեն վարչական շրջանի 2-րդ թաղամասում 44/4 և Փափազյան 118/1-ում կառուցվող բազմաբնակարան բնակելի շենքերի բնակարանատերերը բողոքի ակցիա են անցկացնում կառավարության շենքի առջև:

«Տոնուս»-ից խաբված բնակիչները սպասում են կառավարության նիստի ավարտին, որպեսզի հանդիպեն վարչապետի խորհրդական Հայկ Դավթյանի հետ:

ԼՈՒՐԵՐ.com-ի հետ զրույցում, բնակիչները նշեցին, որ նախորդ անգամ, Դավթյանն իրենց հետ հանդպման ժամանակ ներկայացրել էր ծրագիր, որը մշակվել էր կառավարության և բանկի համատեղ քննարկումների արդյունքում:

Ծրագրի համաձայն՝ Դավիթաշենի բնակիչները սահմանված ժամկետներում կատարելով լրավճարներ՝ կստանան իրենց բնակարանները:

Ըստ, Դավթյանի կատարվող լրավճարները պետք է ուղղվեին շենքի կառուցման աշխատանքներին:

Ըստ ձեռք բերված համաձայնության՝ Դավիթաշեն թաղամասի շենքի բնակիչները յուրաքանչյուր քառակուսի մետրի համար ավելացնելու են 80 դոլար, իսկ Փափազյանի բնակիչները՝ 150 դոլար։

«Փողերը տվել ենք, բայց էլի խաբում են: Մենք համաձայնվել ենք Արցախբանկի և կառավարության բոլոր պահանջներին, բայց արդեն հինգ ամիս է, ասում են կսկսենք շինարարությունը, բայց ոչ մի փոփոխություն:

Խոստանում են, բայց խոստումները շարունակում են չկատարել, անընդհատ հետաձգում են կոնկրետ գործողությունների իրականացման գործընթացը` անհասկանալի և անորոշ պատճառաբանությամբ: Ասում են շենքի շինարարության հետ կապված շատ խնդիրներ կան, խնդիրները լուծվեն, միանգամից կսկսվի շինարարությունը, հարցնում ենք՝ ինչ խնդիրներ կան, չեն բացատրում:

Իսկ Կառավարությունը, փաստորեն, այնքան թույլ է և անկարող, որ Արցախբանկի ղեկավարությունը թքած ունի ՀՀ քաղաքացիների ու կառավարության առջև ստանձնած պարտավորվածությունների վրա:»,-ԼՈՒՐԵՐ.com-ի հետ զրույցում ասաց խաբված բնակիչներից մեկը:

Հիշեցնենք, որ 2006 թվականից շուրջ 120 ընտանիքներ «Տոնուս Քոնսթրաքշնս» ՍՊԸ-ի հետ կնքել են անշարժ գույքի առքուվաճառքի նախնական պայմանագիր, կատարել պարբերական վճարումներ Դավիթաշենում վերը նշված բազմաբնակարան շենքում բնակարան ձեռք բերելու նպատակով: Սակայն բնակիչներին հայտարարել են, որ իրենք բնակարանների նկատմամբ իրավունքներ չունեն, քանի որ շենքը գրավ է դրված «Արցախբանկ» ՓԲԸ-ում։ Արդեն 7 տարի շարունակ խաբված բնակիչները պարբերաբար բողոքի ակցիա են իրականացնում ինչպես պետական իշխանության մարմինների շենքերի առջև, այնպես էլ «Արցախբանկի» տարբեր մասնաճյուղերի մոտ: Պարբերաբար հնչող խոստումները տարիներ շարունակ չեն կատարվել: