Պատգամավորները դեմ են վառելիքի, օղու և ծխախոտի ակցիզային հարկի դրույքաչափերի բարձրացում նախատեսող նախագծին

Ազգային ժողովի պատգամավորները դեմ են որոշ ապրանքների ակցիզային հարկի դրույքաչափի բարձրացմանը, որի վերաբերյալ կառավարությունը համապատասխան նախագիծ է ներկայացրել խորհրդարանի քննարկմանը: Ազգային ժողովում «Ակցիզային հարկի» մասին օրենքում փոփոխություններ և լրացումներ կատարելու մասին օրենքի նախագծի քննարկման ժամանակ պատգամավորներն իրենց ելույթներում նշեցին, որ Հա յաստանում առկա տնտեսական բարդ իրավիճակում վառելիքի, ծխախոտի և օղու ակցիզային հարկի դրույքաչափի բարձրացումն անընդունելի է, քանի որ դա հանգեցնելու է այդ ապրանքների գների թանկացմանը:

ԱԺ ՀՅԴ խմբակցության պատգամավոր Արծվիկ Մինասյանը հայտարարեց, որ ներկայացված օրենսդրական նախաձեռնությունը բացահայտ բացասական ազդեցություն թողնող նախագիծ է: Պատգամավորի խոսքով՝ նախաձեռնության հիմնավորումը չի դիմանում որևէ տնտեսագիտական քննադատության: Ըստ նրա՝ չի կարող հիմնավորում լինել այն, որ Հայաստանն այս եղանակով ներդաշնակեցնում է ակցիզային հարկի դրույքաչափերը Եվրասիական տնտեսական միության դրույքաչափերի հետ: «Այս պահին, տնտեսական այս բարդ իրավիճակում մեր առջև խնդիր է դրված ամեն գնով խուսափել ոչ միայն այդ կարևոր ապրանք ների թանկացումից, այլև օգտվել այն հնարավորություններից ու արտոնություններց, որ այդ ապրանքների մասով մեզ տալիս է Եվրասիական տնտեսական միությունը»,- ասաց պատգամավորը: Մինասյանի խոսքով՝ ներկայացված նախագծի ընդունման դեպքում մինչև տարեվերջ Հայաստանում աշխատատեղերի կրճատում և արտադրության ծավալների նվազում կլինի: Նա կառավարությանը կոչ արեց առաջին ընթերցումից հետո նախագծին ընթացք չտալ:

ԱԺ ԲՀԿ խմբակցության պատգամավոր Միքայել Մելքումյանը նշեց, որ առաջարկվող փոփոխությունների իրականացման դեպքում սպառողական շուկան անցանկալի ցնցումների կենթարկվի: Պատգամավորի խոսքով՝ այս պահին Հայաստանուն տնտեսական իրավիճակը շատ բարդ է, բիզնեսի համար պայմանները ծանր, իսկ բիզնեսի վրա նոր բեռ ավելացնելը անցանկալի հետևանքներ կարող է ունենալ: Միքայել Մելքումյանը ևս կառավարությանը հորդորեց ներկայացված նախագիծը հետ վերցնել՝ ընդգծելով, որ ԲՀԿ-ն դեմ է քվեարկելու դրան, եթե այն ի վերջո դրվի քվեարկության:

Կառավարության ներկայացրած օրենսդրական նախաձեռնությանը դեմ արտահայտվեց նաև քաղաքական մեծամասնության պատգամավորը: ՀՀԿ խմբակցության պատգամավոր Հակոբ Հակոբյանը ևս շեշտեց, որ ներկայացված նախագիծն անընդունելի է: «Էլեկտրաէներգիայի գինը նոր ենք բարձրացրել, դեռևս չենք հասցրել գնահատել, թե դա ինչ ազդեցություն կունենա մեր երկրի տնտեսության վրա, դեռևս չենք հաշվել, թե ինչպիսի փոխհատուցում պետք է տանք, որպեսզի աղքատության մակարդակն այդ թանկացման արդյունքում չավելանա, իսկ կառավարությունը բերել է մի նախագիծ, որով առաջարկում է թանկացնել մի շարք կարևորագույն ապրանքատեսակների ակցիզային հարկի դրույքաչափը: Մենք սրանով գներ ենք բարձրացնելու սոցիալական ամենանեղ շերտի համար: Չի կարելի նման բան անել»,- հայտարարեց պատգամավորը:

Հակոբ Հակոբյանը կարծիք հայտնեց, որ կառավարությունը պետք է լուրջ քայլեր ձեռնարկի, որպեսզի խորհրդարանը դեմ չքվեարկի և չմերժի ներկայացված նախագիծը:

ԱԺ ՀՀԿ խմբակցության պատգամավոր, տնտեսական հարցերի մշտական հանձնաժողովի նախագահ Վարդան Այվազյանը նույնպես իր դժգոհությունը հայտնեց ներկայացված օրենսդրական նախաձեռնության վերաբերյալ՝ ընդգծելով, որ այն խնդրահարույց է և լրացուցիչ ու բազմաբովանդակ քննարկումների կարիք ունի: Նա նաև դժգոհեց, որ նախագիծը հանձնաժողովում քննարկելու ժամանակ էլ չի եղել, քանի որ կառավարությունից շատ ուշ են ստացել: Այվազյանն ընդգծեց, որ նախագիծը մանրամասն քննարկումների կարիք ունի: