Պորտալարի արյան ցողունային բջիջներն ամենից հարմարն են երեխաների փոխպատվաստման համար

Պորտալարից ստացված ցողունային բջիջները, որպես կանոն, փոխպատվաստվում են երեխաներին: Դրանց քանակն ամենից շատ համապատասխանում է փոքր քաշ ունեցող երեխաների կամ երիտասարդների փոխպատվաստման համար: «Արմենպրես»-ի հետ զրույցում այս մասին հայտնեց Ոսկրածուծի դոնորների հայկական ռեեստրի բժշկական տնօրեն Միհրան Նազարեթյանը: «Երեխաներն իրենց քաշով և հասակով շատ հարմար են պորտալարի արյունից վերցվող ցողունային բջիջների քանակի համար: Պորտալարի 1 մլ արյան մեջ պարունակվում է մինչև 100 հազար բջիջ: Փոխպատվաստման համար անհրաժեշտ ցողունային բջիջների քանակը որոշում է այն կենտրոնը, որտեղ պետք է իրականացվի փոխպատվաստումըˋ կախված հիվանդության ծանրությունից և հիվանդի քաշից: Եթե հիվանդի քաշը մեծ է, տրամաբանորեն հավաքած բջիջները պետք է շատ լինեն»,- բացատրեց Նազարեթյանը:

Արյունաբանի խոսքովˋ շատ կարևոր է հասկանալ, որ պորտալարի արյունից ստացված ցողունային բջիջներն այլընտրանք են ոսկրածուծից, արյան հունից կամ մարմնի այլ հատվածներից հավաքած ցողունային բջիջներին, և այս մեթոդի ներդրումը Հայաստանում ընտրության նոր հնարավորություններ է ընձեռում հիվանդությունների բուժման համար: «Պորտալարից ստացված բջիջները պանացեա (հուն. թարգմ.ˋ ամենաբուժություն) չեն, սակայն այլընտրանք են այլ տեղերից ստացված ցողունային բջիջներին: Դրանք ունեն իրենց առավելությունները ոսկրածուծից կամ պերիֆերիկ արյունից հավաքված բջիջների նկատմամբ, և հակառակը»,- ասաց Նազարեթյանը:

Մասնագետի փոխանցմամբ՝ պորտալարի արյունից ստացված ցողունային բջիջների առաջնային առավելությունն այն է, որ համատեղելիության պահանջներն այնքան էլ խիստ չեն: Ավելին, պորտալարի արյան ցողունային բջիջներն ավելի հասանելի են, որևէ ռիսկ չեն պարունակում դոնորի համար, երիտասարդ են, ակտիվ և իմունակայուն: Ինչպես բացատրեց Նազարեթյանը, տարիքի հետ մարդկանց մոտ բազմաթիվ մուտացիաներ են տեղի ունենում, մեծանում է տարբեր հիվանդությունների հավանականությունը, այնինչ նորածնի արյան ցողունային բջիջների մուտացիաների հավանականությունը շատ փոքր է: Երիտասարդ տարիքում մեծ է նաև ցողունային բջիջների ակտիվությունը:

Պորտալարը, որը դառնալու է բիոաղբ, կարելի է ավելի արդյունավետ օգտագործել՝ մարդկանց կյանքեր փրկելու համար: Միլիոնավոր տեսականորեն հնարավոր հիվանդություններից և խանգարումներից մոտ 500-ն է մարդկանց մոտ ավելի հաճախ հանդիպում: Այդ 500 հիվանդությունից 70-ի դեպքում կարելի է ցողունային բջիջներ օգտագործել: Իսկ պորտալարի արյան ցողունային բջիջների փոխպատվաստման դեպքերի 50 տոկոսն իրականացվում է մանկական լեյկոզի դեպքում, մյուս մասը՝ բնածին անեմիաների և բնածին իմունային համակարգի խանգարումների դեպքում: