Ես բոմժի նման պետք է սառնարանի ստվարաթղթե տուփո՞ւմ ապրեմ. Արամ Սիմոնյանը՝ իր ունեցվածքի մասին

Երևանի պետական համալսարանի նորընտիր ռեկտոր Արամ Սիմոնյանը տգեղ է համարում, երբ սկսում են հաշվել մարդու ունեցվածքը: Հունիսի 19-ին լրագրողների հետ զրույցում այս մասին նշեց Սիմոնյանը՝ անդրադառնալով ԶԼՄ-ներում եղած այն հրապարակումներին, թե ինքը ռեկտոր աշխատելու տարիներին «մեծ հարստություն է դիզել»:

«Ես մինչև ռեկտոր դառնալն ավելի շատ անշարժ գույք եմ ունեցել, վստահաբար կարող եմ ասել: Ես ապրում եմ 1976 թվականին իմ հոր ստացած բնակարանում: 52, 7 քառակուսի մետր տարածք ունի: Ես ինքս որևէ բնակարան չեմ ստացել, մինչև հիմա իմ հոր բնակարանում եմ ապրում: Ունեցել եմ մեծ առանձնատուն, որն ինձ ժառանգել է տատիկս, այն վաճառել եմ և արդյունքում ունեմ փոքրիկ ամառանոց Դիլիջանում: Ձեռք եմ բերել այն ժամանակ, երբ Դիլիջանը մոդայիկ վայր չէր: Փոքրիկ տուն է, որն ինձ լիովին բավարարում է»,- «Արմենպրես»-ի փոխանցմամբ՝ նշեց Արամ Սիմոնյանը:

ԵՊՀ ռեկտորի խոսքով՝ ինքն իր աղջկա համար բնակարան է գնել, և բացի այդ էլ հիմա տուն է կառուցում:

«Ունեցել եմ հողակտոր, որը 15 տարի առաջ գնել եմ Երևանի քաղաքապետարանից, այդ ժամանակ ռեկտոր դեռ չեմ եղել: Այդ հողակտորը վաճառել եմ, և դրա գումարով կառուցում եմ տունը: Կրկնում եմ՝ մինչև ռեկտոր դառնալս ավելի շատ անշարժ գույք եմ ունեցել: Այդ բոլորը հիմա չկա, ժամանակին վաճառվել է: Ես բոմժի նման պետք է սառնարանի ստվարաթղթե տուփո՞ւմ ապրեմ: Ամոթ է այս հարցը բարձրացնել»,- նշեց Արամ Սիմոնյանը՝ թվարկելով իր ունեցվածքը:

Երևանի պետական համալսարանի ռեկտոր վերընտրվեց Արամ Սիմոնյանը: Որոշումը կայացվեց հունիսի 19-ին՝ ԵՊՀ հոգաբարձուների խորհրդի նիստում, որին մասնակցեց նաև ՀՀ նախագահ Սերժ Սարգսյանը: Ավելի վաղ կայքերում հրապարակումներ էին հայտնվել այն մասին, որ Արամ Սիմոնյանը ռեկտոր աշխատելու տարիներին «մեծ հարստություն է դիզել»: