Սեյրան Օհանյանն ընդունել է ՀՀ ՊՆ Դ. Կանայանի անվան ինստիտուտի պետի խորհրդական Նիկոլայ Հովհաննիսյանին

ՀՀ պաշտպանության նախարար Սեյրան Օհանյանը հունիսի 19-ին ընդունել է ՀՀ ՊՆ Դ. Կանայանի անվան ազգային ռազմավարական հետազոտությունների ինստիտուտի պետի խորհրդական, ԳԱԱ թղթակից անդամ, Հայաստանի գիտության վաստակավոր գործիչ, ԳԱԱ Արևելագիտության ինստիտուտի տնօրենի խորհրդական, պատմական գիտությունների դոկտոր, պրոֆեսոր Նիկոլայ Հովհաննիսյանին: Հանդիպմանը մասնակցում էր նաև Ազգային ռազմավարական հետազոտությունների ինստիտուտի պետ-պաշտպանության նախարարի խորհրդական, քաղաքական գիտությունների դոկտոր, պրոֆեսոր գեներալ-մայոր Հայկ Քոթանջյանը:

Ինչպես տեղեկացնում են ՀՀ պաշտպանության նախարարության տեղեկատվության եւ հասարակայնության հետ կապերի վարչությունից, ՀՀ պաշտպանության նախարար Սեյրան Օհանյանը, ծննդյան 85-րդ տարեդարձի առթիվ շնորհավորելով դոկտոր Հովհաննիսյանին, բարձր է գնահատել անվանի գիտնականի մեծ ավանդը հայրենական գիտության զարգացման գործում և ընդգծել, որ նրա նման հայրենանվեր, գրագետ և խոր վերլուծական մտածողություն ունեցող անձնավորություններն են օրինակ ծառայում երիտասարդ սերնդի ճիշտ և հայեցի դաստիարակության համար:

Հայրենանվեր մեծ գործունեության համար նախարար Սեյրանը Օհանյանը մեծանուն գիտնականին պարգևատրել է ՀՀ ՊՆ «Դրաստամատ Կանայան» գերատեսչական մեդալով:

Օրեր առաջ անվանի գիտնականին շնորհավորական ուղերձ է հղել նաև ՀՀ նախագահ Սերժ Սարգսյանը:

Նիկոլայ Հովհաննիսյանը Հայաստանում արաբագիտության դպրոցի հիմնադիրն է և երկար տարիներ ղեկավարել է ԳԱԱ արևելագիտության ինստիտուտը: Նա հեղինակ է ավելի քան 500 աշխատությունների, այդ թվում' 80 մենագրական հետազոտության, որոնց զգալի մասը հրատարակվել է արտասահմանում: Դոկտոր պրոֆեսոր Հովհաննիսյանը անդամ է մեկ տասնյակից ավելի արտասահմանյան ակադեմիաների և գիտական ընկերությունների: Պարգևատրվել է բազմաթիվ մեդալներով և պատվոգրերով:

Տասնամյակներ շարունակ ականավոր գիտնականի գիտական ուսումնասիրության առանցքում են եղել այնպիսի հանգուցային հիմնախնդիրներ, ինչպիսիք են Մերձավոր ու Միջին Արևելքի ժողովուրդների պատմությունը, Լեռնային Ղարաբաղի հիմնախնդիրը և էթնոքաղաքական առճակատումները, Հայոց ցեղասպանությունը, հայ-արաբական հարաբերությունները և այլն:

Որպես ՀՀ ՊՆ Դ. Կանայանի անվան ազգային ռազմավարական հետազոտությունների ինստիտուտի պետի խորհրդական' Ն. Հովհաննիսյանը մեծածավալ աշխատանք է կատարել ԱՌՀԻ-ի գիտավերլուծական գործունեության արդյունավետության բարձրացման տեսանկյունից: Մեծ է նրա ավանդը ռազմավարական-անվտանգային հետազոտությունների զարգացման գործում: