«Ուլիսը» սկսում է նախապատրաստվել Եվրոպայի լիգայի խաղերին

Երևանի «Ուլիսը» այսօր կանցկացնի իր առաջին մարզումը՝ նախապատրաստվելով ՈՒԵՖԱ-ի Եվրոպայի լիգայի խաղերին: Թիմը տասը օր ուսումնամարզական հավաք է անցկացնելու Թուրքիայի Բոլու քաղաքում: Առողջարանային «Կորու» համալիրում կան բոլոր պայմանները լիարժեք մարզումներ և հանգիստ կազմակերպելու համար, չնայած թիմի մարզչական կազմի հիմնական խնդիրը բնականաբար մարզումներն են: Կազմում առայժմ փոփոխություններ չկան: Տարվում է աշխատանք թիմի կազմը համալրելու համար, բայց դեռևս վաղ է խոսել նոր խաղացողների մասին: Թուրքիայում ուսումնամարզական հավաքն անցնելու է գլխավոր մարզիչ Սուրեն Չախալյանի և նրա օգնական Վարազդատ Ավետիսյանի ղեկավարությամբ: Մարզիչ Գագիկ Սիմոնյանը Երևանում մասնակցում է մարզչական "A" արտոնագրի դասընթացներին, այդ պատճառով էլ չի ժամանել Թուրքիա: «ՈՒլիսում» արդեն չեն մարզիչներ Ալեքսանդր Թադևոսյանն ու Մայիս Ազիզյանը: Ակումբի հետ պայմանագիրը ավարտվելուց հետո, կողմերը երկկողմանի համաձայնությամբ որոշեցին չշարունակել համագործակցությունը:
Թուրքիայում բացի մարզումներից «ՈՒլիսը» նախատեսել է նաև ստուգողական երեք հանդիպումներ անցկացնել. տեղեկացնում է ակումբի մամուլի ծառայությունը: