Պուտինն ու Նազարբաևը Աստանայում քննարկել են երկկողմ հարաբերություններն ու ԵՏՄ զարգացումը

Ռուսաստանի և Ղազախստանի նախագահներ Վլադիմիր Պուտինը և Նուրսուլթան Նազարբաևն Աստանայում հանդիպման ընթացքում քննարկել են երկկողմ հարաբերություններն ու Եվրասիական տնտեսական միության զարգացումը, հաղորդում է ՌԻԱ «Նովոստին»-ն:

Այս թեման Պուտինն է առաջարկել Նազարբաևին՝  նեղ կազմով բացելով հանդիպումը:

ՌԴ նախագահը նշել է, որ պետական այցի կարգավիճակը, որով նա ժամանել է Ղազախստան, ընդգծում է երկու երկրների հարաբերությունների մակարդակն ու բնույթը: Ռուսաստանի ու Ղազախստանի փոխգործունեությունը նա բնութագրել է որպես «ոչ թե զուտ վստահելի, այլ դաշնակցային հարաբերություններ` բոլոր իմաստներով»:

Պուտինի խոսքով՝ երկու երկրների տնտեսությունների զարգացման համար պայմաններ է ստեղծում նաև ԵՏՄ-ն:

«Մենք տեսնում ենք արդեն մեր շատ գործընկերներից տնտեսական միությունների միջև հարաբերությունների զարգացման վերաբերյալ առաջարկներ, նրանք ցանկություն են հայտնում համագործակցել Եվրասիական միության հետ տարբեր ձևաչափերով»,- ընդգծել է ՌԴ նախագահը:

Նազարբաևն էլ իր հերթին իր գործընկերոջը վստահեցրել է, որ Ղազախստանը «եղել է ու մնում է Ռուսաստանի ամենամոտ ու հուսալի հարևանը»: Նազարբաևը նույնպես արձանագրել է ԵՏՄ-ի զարգացումը: «Կարծում եմ` մենք ճիշտ ճանապարհի վրա ենք»,- շեշտել է նա:

Ղազախստանի նախագահը նաև Պուտինին առաջարկել է հանդիպման ընթացքում քննարկել «տարածաշրջանային ու միջազգային բնույթի սուր հարցերը»: