«Վեցյակի» և Իրանի հանձնաժողովն սկսում է պատրաստել միջուկային համաձայնագրի կատարումը

Իրանի և «վեցյակի» երկրների (ՄԱԿ-ի ԱԽ-ի հինգ մշտական անդամները և Գերմանիան) ներկայացուցիչներից բաղկացած համատեղ հանձնաժողովը հոկտեմբերի 19-ի կգումարի առաջին նիստը՝ քննարկելու իրանական միջուկային ծրագրի վերաբերյալ համաձայնագրի իրագործման հարցերը, որը կնքվել է տակավին հուլիսի 14-ին, իսկ հոկտեմբերի 18-ին ուժի մեջ է մտել: Հանդիպման անցկացման վայր է ընտրվել Ավստրիայի մայրաքաղաքը, որտեղ ամռանը կողմերին հաջողվեց մի քանի տարվա բանակցություններից հետո ընդունել հանրագումարային փաստաթուղթը՝ Գործողությունների համատեղ համապարփակ ծրագիրը:

Այժմ և «վեցյակը», և Իսլամական Հանրապետությունը պետք է ձեռնամուխ լինեն համաձայնագրով նախատեսվաած իրենց պարտավորությունների կատարմանը: Միայն դրանց կատարումից հետո, ինչը Թեհրանի վերաբերմամբ պետք է հաստատվի Ատոմային էներգիայի միջազգային գործակալության կողմից, կսկսվի գործարքի իրականացման փուլը: Սակայն այդ ուղղությամբ տեխնիկական քայլերը դեռևս մշակված չեն: Հենց դրանով էլ Վիեննայում զբաղվելու են «վեցյակի» և Իրանի դիվանագետներն ու փորձագետները:

Համապարփակ համաձայնագիրը ենթադրում է նաև, որ կողմերը, նախքան դրա կատարումն սկսելը, կձեռնարկեն մի շարք օրենսդրական քայլեր: Մասնավորապես, հոկտեմբերի 18-ին Թեհրանը ՄԱԳԱՏԷ-ին ծանուցել է Միջուկային ոլորտում երաշխիքների մասին համաձայնագրին կից Լրացուցիչ արձանագրության կիրառման պատրաստակամության մասին, ինչը միջազգային տեսուչներին ընդլայնված մուտք է ապահովում Իրանի տարածքի օբյեկտներ և ընձեռում է ստուգումներ անցկացնելու հավելյալ հնարավորություններ:

Եվրամիությունը նույնպես հոկտեմբերի 18-ին օրենսդրական հիմք է ստեղծել Իրանի նկատմամբ սահմանված պատժամիջոցները չեղարկելու համար: Համանման քայլ է արել նաև ԱՄՆ-ն. նախագահ Բարաք Օբաման հանձնարարել է Պետդեպարտամենտին, առևտրի, ֆինանսների և էներգետիկայի նախարարություններին՝ ձեռնամուխ լինել երկրի պարտավորությունների կատարմանը, մասնավորապես, սկսել ամերիկյան պատժամիջոցների վերացման գործընթացի նախապատրաստումը, հաղորդել է ՏԱՍՍ-ը: