Բաքվում իսլամիստների և ոստիկանության միջև բախումները տեղափոխվում են շրջաններ

Բաքվի Նարդարան ավանում իսլամիստների և ոստիկանության միջև երեկ սկսված բախումները, որի ժամանակ 6 զոհ է գրանցվել, երկուսը' ոստիկան, բազմաթիվ մարդիկ վիրավորվել և 14 մարդ էլ ձերբակալվել են, սկսել է տեղափոխվել շրջաններ:

Ինչպես հաղորդում է «Արմենպրես»-ը, virtualaz.org կայքը հայտնում է, որ Գյանջայում արմատական իսլամիստները զենք են բարձրացրել և նռնակով հարվածել ոստիկանին:

Ադրբեջանի ՆԳՆ-ն հայտնել է, որ Գյանջայում ձերբակալվել է երեկ Նարդարանում ձերբակալված շիա իսլամիստների առաջնորդ Թալե Բաղըրզադեի կողմնակիցներից Ռուզի Իսմայիլովը: Նարդարանում «Մուսուլմանների շարժում» կազմակերպության ձերբակալված անդամներին աջակցության նպատակով Ռուզի Իսմայիլովն ու իր համախոհները ժամանել են «Շահ Աբբաս» մզկիթ և լոզունգներ հնչեցրել ի պաշտպանություն շարժման մասնակիցների:

Ձերբակալության փորձի ժամանակ Ռուզի Իսմայիլովը հարձակվել է ոստիկանության մայոր Օգթայ Օրուջևի վրա և փորձել նռնակ պայթեցնել' հարվածելով մայորի գլխին:

Մի այլ իսլամիստ' Սաբիր Ալիևը քաղաքի կենտրոնում սկսել է քարոզչություն կատարել «Մուսուլմանների շարժում» կազմակերպության օգտին:

Երկու արմատական իսլամիստներն էլ ձերբակալվել են: Նրանց մոտ հայտնաբերվել են TT տեսակի ատրճանակ, փամփուշտներ և նռնակներ:

Երեկ կեսօրին նամազի ժամանակ իրավապահները ներխուժել են Նարդարանի շիաական «Իմամ Հուսեին» մզկիթ, հայհոյանքներ տեղացել այնտեղ գտնվողների հասցեին, բռնություններ գործադրելով' ձերբակալել Ադրբեջանի շիաների առաջնորդ Թալե Բաղըրզդեին և ևս 14 հավատացյալների: Ոստիկանների գործողությունները զայրացրել են Նարդարանի բնակիչներին: Նրանց և ոստիկանության միջև բախումներ են սկսվել: Փոխհրաձգությունների հետևանքով երկու ոստիկան և 4 բնակիչ սպանվել են:

Նարդարան ավանի մուտքերը արգելափակվել են ՆԳՆ ներքին զորքերի պահակակետերով: Ավանի կենտրոնում ամբողջ գիշեր հավաքված են եղել հարյուրավոր մարդիկ: Նրանք խարույկներ են վառել և կրոնական երգեր երգել:

Նրանք հայտարարել են, որ եթե 24 ժամվա ընթացքում իրավապահներն ազատ չարձակեն Ադրբեջանի շիաների առաջնորդի գլխավորությամբ ձերբակալված իրենց բոլոր ընկերներին, ապա շարունակելու են պայքարել:

Ադրբեջանի ՆԳՆ-ն և գլխավոր դատախազությունը միջադեպի առնչությամբ հայտարարություն է տարածել, որում ասվում է. «Հաստատվել է, որ Թալե Բաղըրովը, Էլման Աղաևը, Զուլֆուգար Միքայիլովը և Աբուլֆազ Բունյաթովը ծրագրում են բռնությամբ փոխել սահմանադրական կարգը և երկրում շարիաթի նորմեր մտցնել: Այդ նպատակով նրանք ստեղծել են «Մուսուլմանական միասնություն» անվամբ շարժում: Նրանք սկսել են իրենց կողմնակիցներ հավաքագրել Բաքվում և երկրի շրջաններում և մատակարարել նրանց զենքով և պայթուցիկ նյութերով»,- ասվում է հայտարարության մեջ:

Բացի այդ, խումբը Նարդարան ավանում անօրինական հավաք է անցկացրել' քննարկելով իշխանությանն անհնազանդության ակցիայի կազմակերպման և բնակչությանը թռուցիկներ բաժանելու հարցեր: Բացի այդ, որոշվել է պետական չինովնիկների ցուցակը, որոնց դեմ ահաբեկչական գործողություններ էին նախապատրաստվում»: