Երեք ժամ, որոնք չփոխեցին աշխարհը, բայց մոտեցրին դիրքորոշումները. Քերիի Մոսկվա այցի արդյունքները

ՌԴ նախագահ Վլադիմիր Պուտինի և ԱՄՆ-ի պետքարտուղար Ջոն Քերիի՝ ավելի քան երեք ժամ տևած հանդիպումը բեկումնային չդարձավ երկու երկրների հարաբերություններում, սակայն կողմերը կարողացան հանգամանորեն քննարկել և ինչ-որ չափով նույնիսկ մոտեցնել դիրքորոշումները Սիրիայի, Ուկրաինայի իրադրության կարգավորման և ահաբեկչության դեմ պայքարի հարցերի շուրջ, տեղեկացնում է «Արմենպրես»-ը՝ հղում անելով ՏԱՍՍ-ին: Բանակցությունների արդյունքում Քերին հայտարարեց, որ Միացյալ Նահանգները չի ձգտում մեկուսացնել Ռուսաստանին, մտադիր է Մոսկվայի հետ համագործակցել ահաբեկչության դեմ մղվող պայքարում և համատեղ լուծել Սիրիայի խնդիրները:

Կրեմլում կայացած բանակցությունների հիմնական հարցերից մեկը Սիրիան էր: «Մենք գտնում ենք, որ պետք է գործել հավաքական ձևաչափով, որը ներառում է բոլոր հանգուցային խաղորդներին, որոնք այս կամ այն չափով ազդում են Սիրիայում կռվող կողմերի վրա, և այն ձևաչափով, որին հավանություն է տվել ՄԱԿ-ի Անվտանգության խորհուրդը»,- հանդիպման ավարտին հայտարարել է ՌԴ ԱԳ նախարարը: Լավրովը նաև նշել է, որ ՌԴ-ն և ԱՄՆ-ն հավաստել են «Վիեննայի հանդիպումների» շրջանակներում Սիրիայի իրադրության կարգավորման վերաբերյալ ձեռք բերված պայմանավորվածությունները:

Իր հերթին ԱՄՆ-ի պետքարտուղարը վստահություն է հայտնել, որ Մոսկվան և Վաշինգտոնը միասին կարող են շատ բան անել Սիրիայի խնդիրները լուծելու համար: «Ինչպես «Վիեննա-1»-ը, այնպես էլ «Վիեննա-2»-ը, լավ սկիզբ են և կարող են մի ամբողջ շարք հնարավորություններ բացել»,- ասել է նա:

Քերին պնդել է, որ Բաշար Ասադը պետք է հեռանա: «Մենք ասացինք, թե չենք կարծում, որ Ասադը հնարավորություն ունի ապագայում լինել Սիրիայի առաջնորդը»,- ասել է Քերին լրագրողներին ՌԴ նախագահի հետ կայացած հանդիպումից հետո: Բայց իսկույն էլ նշել է, որ կողմերը բանակցություններում իրենց ուշադրությունը չեն կենտրոնացրել Ասադի պաշտոնաթողության վրա:

Լավրովը նշել է, որ Ռուսաստանի, ԱՄՆ-ի և այլ մասնակիցների շնորհիվ հաջողվել է մեռյալ կետից շարժել սիրիական կարգավորումը: Հաջողությունն ամրապնդելու համար որոշվել է դեկտեմբերի 18-ին Սիրիային նվիրված հանդիպում անցկացնել Նյու Յորքում, որի արդյունքների հիման վրա պլանավորվում է ընդունել ՄԱԿ-ի Անվտանգության խորհրդի բանաձև և դրանով իսկ հավաստել հոկտեմբերի 30-ին և նոյեմբերի 14-ին Վիեննայում ձեռք բերված պայմանավորվածությունները:

ՌԴ-ի նախագահի հետ հանդիպմանը Քերին ընդգծել է, որ Միացյալ Նահանգները պատրաստ է աշխատել Ռուսաստանի հետ «Իսլամական պետությանը» պարտության մատնելու համար: «Մեր երկրների, գլոբալ հանրակցության շահերից է բխում, որ Ռուսաստանը և ԱՄՆ-ն արդյունավետ աշխատեն»,- ասել է նա: «Ես նախագահ Պուտինին հավաստեցի, որ ԱՄՆ-ն պատրաստ է աշխատել Ռուսաստանի հետ ԴԱԻՇ-ին պարտության մատնելու համար»,- նշել է Քերին:

Կրեմլում կայացած հանդիպմանը կողմերը նաև քննարկել են ուկրաինական թեմատիկան: Ռուսաստանը և ԱՄՆ-ը հավաստել են աջակցությունն Ուկրաինայի վերաբերյալ Մինսկի պայմանավորվածություններին, հայտարարել է Լավրովը՝ ամփոփելով բանակցությունների արդյունքները: Ընդսմին նա նշել է, որ Ռուսաստանը «կոնկրետ առաջարկներ ունի» այն բանի վերաբերյալ, թե ինչպես ավելի արդյունավետ հասնել դրանց իրականացմանը:

ԱՄՆ-ի պետքարտուղարն իր հերթին հայտարարել է, թե որքան արագ կատարվեն Մինսկի համաձայնությունները, այնքան ավելի շուտ կչեղարկվեն Ռուսաստանի նկատմամբ ԱՄՆ-ի և ԵՄ-ի սահմանած պատժամիջոցները: «Անհրաժեշտ է քայլեր ձեռնարկել Մինսկի պայմանավորվածությունների իրագործման ուղղությամբ, շարունակել համատեղ ջանքերը՝ լուծելու Ուկրաինայի հակամարտությունը»,- հավելել է Քերին: