Ազգիս արժանի զավակը…

Ժողովո՛ւրդ ջան, մի բան հարցնեմ՝ արդյոք չե՞ք կարոտել այն երանելի ժամանակները, երբ, ասենք, մի հասարակ մեքենա կայանելը բոլորիս համար այդքան մեծ խնդիրներ չէր առաջացնում, երբ այն միանգամայն անվճար էր մեզանում, երբ կարմիր գծերը գոյություն չունեին դեռ ու երբ վարորդ լինելը շատ ավելի հեշտ էր, քան հիմա կարելի է պատկերացնել: Ավա՜ղ, այդ երանելի ժամանակներն այլևս անցյալում են գոնե մեր՝ երևանցիներիս համար, բայց ահա գյումրեցիների բախտը, ինչպես ասում են, այս առումով կարծես թե բերել է. Գյումրիի քաղաքապետարանից տեղեկացնում են՝ հաշվի առնելով գյումրեցիների սոցիալական վիճակը, նկատի ունենալով վարորդների դիմում-բողոքները՝ ավտոկայանատեղիների համար պահաջվելիք գումարի մասով՝ Գյումրիի քաղաքապետ Սամվել Բալասանյանի առաջարկով Գյումրու ավագանին 2015 թվականի դեկտեմբերի 17-ի թիվ 202–Ն որոշմամբ հաստատեց. համայնքի վարչական տարածքի ընդհանուր օգտագործման փողոցներում կազմակերպված ավտոկայանատեղիներից օգտվելը 2016թ-ի հունվարի 1-ից դարձնել անվճար: Որպես նման որոշման հիմք, պատասխանատուների պարզաբանմամբ, հանդիսացել է նաև այն փաստը, որ վճարովի ավտոկայանատեղիներից համայնքային բյուջե տարեկան մուտքագրվում էին չնչին գումարներ: Նկատի ունենալով ավտոկայանատեղիներում աշխատող քաղաքացիների աշխատատեղի խնդիրը՝ Գյումրիի քաղաքապետարանը պատրաստակամ է նրանց ապահովել աշխատանքով: Ցանկություն հայտնողները կարող են դիմել Գյումրիի քաղաքապետարան:

Հրաշալի է, հետո էլ ասում ենք, թե մեր երկրում լավ բաներ չեն լինում. պարզվում է՝ ցուցաբերում էինք անհարկի հոռետեսություն՝ նմանվելով իսկական «բոբոների», որոնք չեն ցանկանում տեսնել այն լավն ու դրականը, որ կատարվում է շրջապատում: Իհարկե, օբյեկտիվ լինելու համար պետք է մի բան ասենք, իսկ ավելի ճիշտ հարց ուղղենք պատկան մարմններին. սիրելինե՛րս, կարո՞ղ եք մեզ բացատրել, թե, այնուամենայնիվ, ո՞րն էր Գյումրիում՝ Հայաստանի ամենաաղքատ քաղաքում, ավտոմեքենաների կայանատեղիները վճարովի դարձնելու իմաստը: Մի՞թե նպատակ էիք ձեր առջև դրել՝ ներդնելու հերթական գործիքը, որը կօգներ ձեզ՝ ինչպես հարկն է կեղեքելու սեփական համաքաղաքացիներին: Միգուցե այս հարցը համարեք հռետորականների շարքից, բայց համաձայնե՛ք, որ այն միանգամայն տեղին է հնչում: Իսկ ի՞նչ, եթե այս ամենն ընդամենը մի հերթական «տրյուկ» էր, որի բուն նպատակը այն հետագայում չեղարկելն էր՝ ցույց տալու համար մարդկանց, թե քաղաքապետարանն էլ է ազգանպաստ գործունեություն ծավալում, ժողովրդի մասին մտածում… Մարազմատի՞կ է հնչում, դե ինչ, համաձայնե՛ք, որ այս երկրում մեր բոլորիս կյանքն է վերածվել իսկական մարազմի, ուր սեփական ժողովրդի տակը փորելը շատ իշխանավորների համար դարձել է զվարճանքի պես մի բանի. ասենք՝ ով ուզում է ընդմիջմանը մի փոքր թարմանալ, որոշում է այդ ընթացքում օրենքներ մոգոնել, որոնց իրական նպատակն անգամ ինքը չգիտի:

Կատակն ու հեգնանքը՝ կատակ ու հեգնանք, բայց խոստովանե՛ք, որ ինչ-ինչ, բայց միայն ավելորդ գովազդվելու առիթ ունենալու համար չարժեր այսքան ժամանակ խեղճ մարդկանց նյարդերի հետ խաղալ, անհարկի թալանի մեթոդ մշակել, որ հետո էլ որոշեիք այն չեղարկել: Համաձայն եք, չէ՞…

Դավիթ Բաբանով