Սերնդափոխությունն ուշանում է

ՀՀԿ-ում ակնհայտորեն սերնդափոխությունն ուշանում է: Չի կարելի մարդկանց թիմում պահել այնքան երկար, մինչև կորցնեն մի բան ասելուց առաջ մտածելու հատկությունը: ՀՀԿ-ական պատգամավոր Սուքիաս Ավետիսյանն ասուլիսի ժամանակ պատասխանելով ասուլիսի մյուս բանախոս Անահիտ Բախշյանի՝ ընտրությունների ժամանակ ՀՀԿ-ի «ինչքան ուզել, այնքան խփելու» մասին ակնարկին՝ ասել է, թե «էդ էլ է շնորհք»:

Ահա այսպես է լինում միշտ՝ ինչ-որ մեկն առանց մտածելու մի բան ասում է, կամ անհաջող կատակ է անում՝ մոռանալով, որ ինքը պատգամավոր է և որ նույնիսկ իր արած կատակներին պետք է ուշադիր լինի, իսկ մնացած թիմը հաջորդող օրերին պետք է մտածի, թե ինչպես պաշտպանվի քննադատություններից, հարձակումներից և ինչպես դիմանա ծաղրին:

Բայց Սուքիաս Ավետիսյանն անգամ այսքանով չի սահմանափակվել և հերթական «միտքն» է արտահայտել, թե ընտրությունների արդյունքներն իրենք չեն «նկարում», քանի որ «նկարելը» նկարիչների համար է: Այս տեսանկյունից Ավետիսյանն իրոք ճիշտ է՝ իրենք չեն «նկարում», իրենք պատվիրում են «նկարը», ստեղծում և ապահովում համապատասխան պայմաններ, իսկ վերջում արդեն «նկարում» է Տիգրան Մուկուչյանը:

Դիտել 21-րդ րոպեից.

Կարեն Վարդանյան