Խիստ միջոցներ կիրառելու կարիքը վաղուց է զգացվել

Երևանի քաղաքապետարանը որոշել է մայրաքաղաքի չնախատեսված վայրերում աղբ թափելու դեմ այսուհետ խիստ պայքար մղել՝ ֆիզիկական և պաշտոնատար անձանց նկատմամբ պատժամիջոցներ և տուգանքներ նշանակելու ու կիրառելու միջոցով: Լավ բան է, իհարկե, մտածել քաղաքապետարանը և, անշուշտ, խիստ միջոցներ կիրառելու կարիքը վաղուց է զգացվել, քանի որ միգուցե խեղաթյուրված ու այլասերված արժեհամակարգի արդյունք է, բայց հաճախ կարող ենք տեսնել, թե ինչպես մեր բազմաթիվ համաքաղաքացիներ նույնիսկ կենցաղային աղբը թափում են չնախատեսված վայրում: Սակայն նորություն չէ, որ Հայաստանում շատ ու շատ այդպիսի ծրագրեր, նույնիսկ՝ օրենքներ, մնում են թղթի վրա, չիրականացված: Կոնկրետ հասարակության ապրելակերպի միջից այդ փնթիությունը վերացնելու և սեփական քաղաքի նկատմամբ սրտացավ վերաբերմունք ձևավորելու համար երկարատև աշխատանքներ պետք է տարվեն, եթե հարկ է՝ խիստ միջոցներ ձեռնարկվեն: Փորձը ցույց է տալիս, որ շատ դեպքերում մեր իշխանությունների և ղեկավար կառույցների կամքը չի հերիքում՝ երկրում կարգուկանոն հաստատելուն միտված միջոցառումներն անցկացնել պատշաճ կերպով՝ մինչև ցանկալի արդյունքը:

Կարծում եմ, քաղաքապետարանը մոտ ապագայում պետք է առնվազն հանրությանը ներկայացնի նաև կատարված աշխատանքների արդյունքները, թե քանի ֆիզիկական և պաշտոնական անձ է արդյունքում տուգանվել, հակառակ դեպքում կստացվի, որ սա հերթական ձևական որոշումն էր:

Կարեն Վարդանյան