Նոր թիմ է ձևավորվում, հին կազմից մնում է դարպասապահը և 4 խաղացող. Սերգեյ Յուրանը՝ «Միկան» գլխավորելու մասին

Երևանի «Միկայի» նորանշանակ գլխավոր մարզիչ Սերգեյ Յուրանը Советский спорт-ի հետ զրույցում խոսել է երևանյան թիմի հետ պայմանագիր կնքելու մասին:

Նշենք, որ մարզչի պայմանագիրը «Միկայի» հետ ուժի մեջ է մինչև այս տարվա հունիսի 1-ը:

-Ինչո՞ւ Հայաստանի առաջնությունն ու «Միկան»:

- Մարզական պրակտիկա է: Բացի այդ, առաջադրանքներ կան՝ դուրս գալ եվրագավաթներ: Եվրոպայի լիգային մասնակցություն ապահովող չորրորդ տեղից 10 միավորով ենք հետ մնում, այդ պատճառով կպայքարենք: Կա նաև գավաթի կիսաեզրափակիչը, այսինքն՝ տիտղոսի համար ենք պայքարելու: Այս երկու փաստն ազդեց որոշմանս վրա:

- Արդեն հասցրե՞լ եք աշխատել թիմի հետ:

- Աո, Մոսկվայում հավաք ենք անցկացրել, երկու ընկերական խաղ ենք ունեցել, հաղթել ենք «Լոկոմոտիվ-2»-ին (9:1) և Տուլայի «Արսենալին»՝ (2:1): Մեզ մոտ գրեթե նոր թիմ է ձևավորվում: Հին կազմից մնում է միայն դարպասապահը և 4 խաղացող:

- Ի՞նչ կասեք Հայաստանի առաջնության մակարդակի մասին:

- Այդ մասին իմացել եմ «Միկայի» նախագահ Խորեն Հովհաննիսյանից, երբ նա եկել էր Մոսկվա՝ բանակցությունների: Տեղական ակումբների մակարդակը մոտավորապես համապատասխանում է Ռուսաստանի առաջին դիվիզոնի 10-րդ տեղից մինչև երկրորդ դիվիզիոնի առաջին երկրորդ տեղերին: Կարևորը կան նպատակներ, իսկ ակումբը գլխավորում են հավակնոտ մարդիկ:

- Ակումբում սպասե՞նք ռուս ֆուտբոլիստների:

- Այո, Հայաստանում լեգիոներների լիմիտ չկա: Միայն դարպասապահը չպետք է լինի օտարազգի, իսկ մյուս դեպքերում սահմանափակում չկա: