Ահա այսպիսի բան է քաղաքականությունը...

Հետաքրքիր մարդիկ են ԲՀԿ պատգամավորները. նույն օրը մեկը՝ Վահան Բաբայանը, լրատվամիջոցին մեկնաբանություն է տալիս, թե ՀՀԿ-ից կոալիցիա մտնելու հրավեր ստանան՝ կընդունեն, մյուսն էլ՝ Միքայել Մելքումյանը, ասում է, թե ԲՀԿ-ն ՀՀԿ-ից հրավեր չի ստացել: Ախր էլ ի՞նչ հրավեր ստանալու կարիք կա, եթե ձեր գործընկերն ինքն է ինքնակամ «հրավիրվել»: Այսինքն՝ ՀՀԿ-ն արդեն տեղյակ է, որ ԲՀԿ-ն ուզում է կոալիցիա մտնել, մնում է՝ տա իր համաձայնությունը: Եվ ինձ թվում է՝ այդ համաձայնությունը շատ չի ուշանա, քանի որ ՀՀԿ-ականներն արդեն իսկ հայտարարել են, որ կարող են համագործակցել տարբեր քաղաքական ուժերի հետ տարբեր ձևաչափերում: Իհարկե, ՀՅԴ-ի դեպքում ՀՀԿ-ականներն ավելի բացահայտ են խոսում, ԲՀԿ-ի դեպքում՝ ավելի զգուշավոր, սակայն դա էլ երևի ժամանակի խնդիր է:

Ահա այսպիսի բան է քաղաքականությունը՝ դեռ մեկ տարի առաջ գրեթե թշնամացած էին, իսկ հիմա շահերն սկսեցին համընկնել: Սակայն ի տարբերություն շատերի՝ ես այս երևույթին այդպես բացասական չեմ նայում և չեմ պատրաստվում խիստ քննադատության ենթարկել, քանի որ, կարծում եմ, քաղաքական ուժն իր նպատակները, ծրագրերն ավելի արդյունավետ կերպով կյանքի կոչելու համար պետք է ձգտի հասնել իշխանության, որովհետև այդպիսով հնարավորությունները մեծանում են: Պարզապես այս դեպքում քաղաքական ուժը գերադասելի է, որ ազնիվ լինի և դադարի «ընդդիմություն» խաղալ:

Կարեն Վարդանյան