Եթե համաճարակ չէ, ապա ի՞նչ իմաստ ուներ դասերը հետաձգելը

Մինչ առողջապահության նախարարությունը համառորեն փորձում է համոզել, որ երկրում խոզի գրիպի համաճարակ չկա, կրթության նախարարը ևս մեկ անգամ հայտարարում է, որ դասերը հետաձգվում են:

Ու հարց է առաջանում՝ եթե վիճակը իսկապես կայուն է, եթե սա չի կարելի անվանել համաճարակ, ապա ի՞նչ իմաստ ուներ դպրոցներում և մանկապարտեզներում դասերը մինչև փետրվարի 1-ը հետաձգելը: Չէ՞ որ հետագայում խնդիր է առաջանալու գալիք արձակուրդների և շաբաթ օրերի հաշվին վերականգնել բաց թողված դասաժամերը, որպեսզի ընդհանուր ուսումնական պրոցեսը չտուժի:

Այդքանը հասկանալով հանդերձ՝ կրթության նախարարությունը դժվար թե հետաձգեր դասերը: Եթե հետաձգվել են, ուրեմն ինչ-որ վտանգ կա:

Միգուցե առողջապահության նախարարությունը ավելի մեղմ է ներկայացնում իրավիճակը՝ խուճապ չառաջացնելու համար, սակայն այդ դեպքում դասերն էլ դպրոցներում չպետք է հետաձգեին, որովհետև դասերի հետաձգումը մարդկանց մեջ հարցեր է առաջացնում, ինչն էլ ինքնին խուճապ է առաջացնում: Չէ՞ որ մարդիկ ընդունակ են տրամաբանելու:

Կարեն Վարդանյան