Գավաթի առաջին խաղարկությունում մենք պատվով կատարեցինք մեր առջև դրված խնդիրները. Գագիկ Սարգսյան

Ծաղկաձորում ընթացող Զարգացող ֆեդերացիաների դահուկասահքի անդրանիկ գավաթի խաղարկությունն ավարտվեց: Հայաստանի դահուկային սպորտի ֆեդերացիայի գլխավոր քարտուղար Գագիկ Սարգսյանը ՀԱՕԿ լրատվականի հետ զրույցում ամփոփեց խաղարկությունը և խոսեց ձեռքբերումների մասին:

- Ամփոփելով զարգացող ֆեդերացիաների դահուկասահքի գավաթի առաջին խաղարկությունը՝ ինչպիսի՞ գնահատական կտաք:

- Ինձ համար լավ գնահատականը մի քանի բաղկացուցիչ ունի: Եթե լավ, ուրեմն՝ լավ: Այն գերազանց ստացվեց մեզ համար, քանի որ Հայաստանի թիմը դարձավ գավաթակիր: Բնական է, որ մեզ համար դա գերազանց արդյունք է: Միջազգային ֆեդերացիայի ներկայացուցիչները և մասնավորապես Զարգացող դահուկային ֆեդերացիաների խորհրդի նախագահն աշխատանքը պարզապես անթերի գնահատեց: Նա սկսել է այլ երկրների համար հենց Հայաստանի օրինակը բերել: Գավաթի առաջին խաղարկությունում մենք պատվով կատարեցինք մեր առջև դրված խնդիրները:

- Արդյո՞ք այս մրցաշարը կարող է հիմք ծառայել միջազգային այլ մրցաշարեր ևս Հայաստանում անցկացնելու համար:

- Բնականաբար: Երբ ինձ հարցրին, թե որքան ժամանակ ենք նախապատրաստվել այս առաջնությանը, ես ասացի, որ մոտ մեկ տարի: Բայց իրականում մենք այս ամենին նախապատրաստվել ենք ոչ թե մեկ, այլ երկար տարիներ: Ինքներս սկսել ենք ամենափոքր մրցաշարից և փոքրական թիմով, բայց այսօր անցկացնում ենք նման խոշոր մրցաշար: Սա տարիների քրտնաջան աշխատանքի արդյունք է: Տա Աստված՝ մենք Հայաստանում տեսնենք ավելի խոշոր մրցաշարեր:

- Որքանո՞վ բարձրացան հայ մարզիկների վարկանիշային միավորներն այս մրցաշարից հետո:

- Մենք երբևէ չէինք էլ կարող երազել, որ Հայաստանում կունենանք մրցաշար և լավագույն վարկանիշային միավորը կլինի 31-ը: Եվ մրցումային առաջին օրը մենք ունեցել ենք 31 միավոր՝ դահուկասահքի խոշոր մրցաշարերում նման արդյունքներ չեն գրանցվում: Այս մասին գրում է ՀԱՕԿ լրատվության բաժինը: