Բաժանորդն անհասանելի է

Ցավալի է, որ երբեմն մենք մեր որոշ նախարարությունների գոյության մասին սկսում ենք մոռանալ: Օրինակ՝ ԵԽԽՎ-ի հակահայկական բանաձևերի և դրանցից մեկի ընդունման մասին վերջին օրերին ով ասես՝ խոսեց, քաղաքական ու ոչ քաղաքական դեմքեր, հասարակական ու հակահասարակական գործիչներ, սոցիալական ցանցերի սովորական օգտատերեր:

Բոլորը խոսեցին, կարծիք հայտնեցին, գնահատական տվեցին, բայցի այն մարմնից, որն առաջին անգամը չէ, որ նման դեպքերում լռում է և ժամանակավոր անհայտանում: Խոսքս մեր հայրենի Արտաքին գործերի նախարարության մասին է: Բանաձևերի քննարկումից արդեն 3 օր անցավ, բայց մեր ԱԳՆ-ն դեռ ասելիք չունի, ընդամենն այսօր Էդվարդ Նալբանդյանը Եռաբլուրում լրագրողներին ասել է, թե այդ կապակցությամբ մամուլի ասուլիս կտա: Թե ե՞րբ կտա՝ դա էլ հայտնի չէ: Միգուցե 3 օր էլ անցնի՝ նո՞ր, երբ արդեն բոլորն այդ մասին մոռացած կլինեն:

Ինչպես տեսնում ենք՝ մեր ԱԳՆ-ն հավատարիմ է մնում իր՝ կարելի է ասել՝ որդեգրած աշխատաոճին. նա սիրում է, որ մենք իրեն փնտրում ենք, փնտրում ենք երկար և դժվարությամբ գտնում: Այսպիսի աշխատելաոճը ես կբնութագրեի երկու բառով' բաժանորդն անհասանելի է:

Կարեն Վարդանյան