Ադրբեջանում եւ մեկ բանկ է փակվել

Նավթի գնանկման պատճառով տնտեսական ճգնաժամում հայտնված Ադրբեջանում իրար հետեւից փակվում են բանկերը:

Ինչպես հաղորդում է «Արմենպրես»-ը' վկայակոչելով qafqazinfo.az կայքը Ադրբեջանի կենտրոնական բանկը երեկ որոշել է չեղյալ հայտարարել եւս մեկ բանկի' Texnikabank-ի գործունեության թույլտվությունը:

Նշենք, որ միայն այս ամիս Ադրբեջանում արդեն 7 բանկ է փակվել:

Բանկերի լիցենզիաները չեղարկվել են այն բանի հետ կապված, որ նրանց գումարային կապիտալը չի համապատասխանում ԿԲ-ի կողմից պահանջվող չափին, ինչպես նաեւ այն պատճառով, որ բանկերն ի վիճակի չեն վարկատուների առաջ կատարել իրենց պարտավորությունները եւ ընթացիկ հուսալի ղեկավարում ապահովել:

Միայն վերջին շաբաթվա ընթացքում Ադրբեջանում վերացվել են նաեւ United Credit Bank-ի, NBCBank-ի, Bank of Azerbaijan եւ «Գյանջա-բանկ»-ի գործունեության թույլտվությունները:

Հիշյալ բանկերից NBC Bank-ը հիմնադրվել է 1992 թվականի դեկտեմբերին: Մինչեւ 2003 թվականն այն կոչվել է «Ռուզու բանկ»: Unted Credit Bank-ը հիմնադրվել է 1996 թվականին:

Նավթի համաշխարհային գների անկումը սկսվելուց ի վեր Ադրբեջանում մինչ այժմ մոտ 18 բանկ փակվել է: Ներկայում Ադրբեջանում 38 բանկ է գործում:

Haqqin.az կայքն ավելի վաղ մեջբերել էր սոցցանցերում հայտնված ադրբեջանական բանկերից մեկի' Atlant Bank-ի' բանջարեղենի եւ մրգերի վաճառակետի վերածված լուսանկարը, որը հանդիսանում է Ադրբեջանի բանկային համակարգի կրախի ակնառու օրինակ: