Մոսկվայի բորսայում եվրոյի փոխարժեքը գերազանցել է 87 ռուբլին, դոլարի փոխարժեքը հասել է 79,84 ռուբլու

Մոսկվայի բորսայում փետրվարի 2-ին ընթացող սակարկությունների ընթացքում ռուբլու նկատմամբ եվրոյի փոխարժեքը նախորդ սակարկությունների փակման մակարդակի համեմատությամբ աճել է 2,85 ռուբլով և կազմել 87,1 ռուբլի՝ 87 ռուբլու նշագիծն առաջին անգամ գերազանցելով հունվարի 26-ից: Դոլարի փոխարժեքը աճել է 2,53 ռուբլով՝ մինչև 79,84 ռուբլի, տեղեկացնում է «Արմենպրես»-ը՝ հղում անելով ՏԱՍՍ-ին:

Ռուբլին էժանանում է նավթին զուգընթաց, որի գինը վերսկսել է անկումն անցած շաբաթվա վերջին բարելի դիմաց 36 դոլարի նշագծին հասնելուց հետո:

Լոնդոնի ICE սակարանում Brent տեսակի նավթի 2016 թվականի ապրիլյան ֆյուչերսի արժեքը փետրվարի 2-ին նվազել է 3,5 տոկոսով՝ բարելի դիմաց մինչև 32,98 դոլար: