Ալիևին Էրդողանի հետ դժվար բանակցություններ են սպասում

Թուրքիայի նախագահ Ռեջեփ Թայիփ Էրդողանը փետրվարի 18-ին այց կկատարի Ադրբեջան: Այցի մանրամասները դեռևս ճշտվում են: Էրդողանի այցի ժամանակ պետք է անցկացվի Թուրքիայի հետ Ադրբեջանի միջև Բարձր մակարդակի ռազմավարական համագործակցության խորհրդի նիստ:

Ինչպես հաղորդում է «Արմենպրես»-ը, «Ազադլըգ» թերթն ուշադրություն է հրավիրում այն բանի վրա, որ Էրդողանի այցը համընկնում է Թուրքիայի և Ռուսաստանի միջև հերթական լարվածության ժամանակաշրջանին՝ կապված Անկարայի կողմից այն պնդման հետ, թե ռուսաստանյան ինքնաթիռն արդեն երկրորդ անգամ խախտել է թուրքական օդային սահմանը, ինչը Մոսկվան կտրականապես հերքում է:

Թերթը գրում է, որ Բաքվում Թուրքիային համարում են Ադրբեջանի ռազմավարական դաշնակից, Ռուսաստանին' ռազմավարական գործընկեր, իսկ երկու երկրներին' Ադրբեջանի ամենամեծ առևտրային գործընկերներ:

Նշելով, որ պաշտոնական Բաքուն մինչ այժմ հստակ դիրքորոշում ցույց չի տվել անցյալ տարվա դեկտեմբերից սկսված Մոսկվա-Անկարա լարվածությանը, թերթը գրում է, որ, ամենայն հավանականությամբ, Էրդողանը Բաքու է ժամանում պարզելու այդ հանգամանքը:

Թերթը հարցադրել է, թե Կրեմլի հետ կապված հարաբերություններում որոշ փոփոխություններ մտցնելու Անկարայի հնարավոր պահանջը կարո՞ղ է, արդյոք, դրական պատասխանի արժանանալ Բաքվում:

Ադրբեջանցի քաղաքագետ Հիքմեթ Հաջիզադեն, ըստ թերթի, գտնում է, որ չի բացառվում, որ Էրդողանը Բաքվում բարձրացնի Ռուսաստանի և Թուրքիայի միջև լարվածության խնդիրը և փորձի պարզել Ադրբեջանի դիրքորոշումը:

«Միանշանակ է, որ միևնույն ժամանակ քննարկան թեմա կհանդիսանան նաև Ադրբեջանում խորացող տնտեսական խնդիրների հետ կապված հարցերը: Նույնիսկ չի բացառվում, որ ստեղծված տնտեսական ճգնաժամի հետ կապված Բաքուն ֆինանսական օգնություն խնդրի Թուրքիայից»,- ասել է նա:

Նշենք, որ 4 մլրդ դոլար շտապ վարկ ստանալու վերաբերյալ հունվարի 28-ից մինչև փետրվարի 3-ը Արժույթի միջազգային հիմնադրամի և Համաշխարհային բանկի պատասխանատուների հետ Ադրբեջանի ղեկավարության՝ Բաքվում անցկացրած բանակցություններն անարդյունք են անցել: Ադրբեջանի վարկային վարկանիշը միջազգային վարկանիշային կազմակերպությունների կողմից «աղբային» մակարդակի իջեցվելու պատճառով, ամենայն հավանականությամբ, ապարդյուն են անցել նաև Աբու Դաբիում փետրվարի 2-ին Արաբական Միացյալ Էմիրություններից Ալիևի օգնություն խնդրելու բանակցությունները: Եվ այժմ, նավթային եկամուտները մոտ երեք անգամ նվազելու պատճառով «ցայտնոտում» հայտնված Ալիևը կփորձի փող պարտք վերցնել իր «մեծ եղբորից»: