Էդմոն Մարուքյանը՝ «Ժառանգություն» խմբակցության «գերեզմանափոր». ՀՀԿ-ի դարդը

Ազգային ժողովի ՀՀԿ խմբակցության քարտուղար Գագիկ Մելիքյանն անկախ պատգամավոր Էդմոն Մարուքյանին կոչ արեց չդառնալ «Ժառանգություն» խմբակցության «գերեզմանափորը»՝ ՄԻՊ-ի պաշտոնի համար ներկայացնելով Զարուհի Փոստանջյանի թեկնածությունը, ով «Ժառանգություն» խմբակցության վերջին ներկայացուցիչն է: Պետաիրավական հարցերի մշտական հանձնաժողովում ՄԻՊ-ի թեկնածուին ԱԺ-ին ներկայացնելու քննարկման ժամանակ Գագիկ Մելիքյանը հարց ուղղեց Էդմոն Մարուքյանին՝ «Ժառանգություն» կուսակցությունում տեղյա՞կ են, ՀՀԿ-որ ինքը ՄԻՊ-ի պաշտոնի համար առաջադրել է խորհրդարանում իրենց խմբակցության միակ ներկայացուցչի թեկնածությունը:

««Ժառանգություն» կուսակցությունում տեղյա՞կ են, որ առաջադրել եք Զարուհի Փոստանջյանի թեկնածությունը, եթե այո, ապա ինչո՞ւ կուսակցությունից չեն արձագանքել: Ինչո՞ւ եք ուզում փակել «Ժառանգություն» խմբակցությունը, քանի որ միակ անդամը տիկին Փոստանջյանն է: Կարո՞ղ է՝ լուրջ եք ընդունել, որ ինքը կընտրվի օմբուդսմեն: Կարծում եմ՝ ճիշտ չէ «գերեզմանափոր» լինել որևէ կուսակցության համար»,- ասաց Մելիքյանը:

Գագիկ Մելիքյանի հարցին արձագանքեց ԱԺ պետաիրավական հարցերի մշտական հանձնաժողովի նախագահ Հովհաննես Սահակյանը, ով նկատեց, որ «Լուսավոր Հայաստանը» չի կարող «գերեզմանափոր» դառնալ:

Էդմոն Մարուքյանը նախ իր զարմանքը հայտնեց, որ իրեն կամ իր քաղաքական ուժին «գերեզմանափորի» պիտակ են փակցնում: «Զարմացած եմ, որ գերեզմանափորի պիտակ եք փորձում կպցնել ինձ կամ այն քաղաքական ուժին, որ ներկայացնում եմ. եթե այս երկրում գերեզմանափորություն եղել է, հաստատ՝ ոչ մեր կողմից: Չեմ կարծում, որ ես պետք է քննարկեմ «Ժառանգություն» կուսակցության հետ կապված հարցերը: Եթե Զարուհի Փոստանջյանն առաջադրվել է, ուրեմն ունի համաձայնություն կուսակցությունից: Մի անհանգստացեք «Ժառանգության» համար, քանի որ նա չի վերանա ԱԺ-ում: Զարմանում եմ, որ ՀՀԿ-ն է այդ դարդն անում: Եթե լուրջ չեք ընդունում այս թեկնածուին, ապա ինչո՞ւ եք խառնվել իրար: Եթե, իհարկե, ձեր մեջ կլինեն մարդիկ, որ հնարավոր է՝ գաղտնի նրա օգտին քվեարկեն: Զարուհի Փոստանջյանն այն մարդն է, որի վրա քաղաքական ճնշումները չեն ազդի»,- եզրափակեց Մարուքյանը: