Լոս Անջելեսում կհայտարարվեն «Գրեմմի» երաժշտական մրցանակի դափնեկիրները

Լոս Անջելեսում փետրվարի 15-ին կհայտարարվեն «Գրեմմի» երաժշտական մրցանակի դափնեկիրները: Պարգևի հանձնման 58-րդ արարողությունը, որը շնորհվում է ԱՄՆ-ի ձայնագրման ակադեմիայի կողմից, հինգերորդ տարին անընդմեջ վարելու է երկու «Գրեմմի»-ի դափնեկիր ամերիկացի ռեփ-կատարող LL Cool J-ն, տեղեկացնում է «Արմենպրես»-ը:

Այս տարի անվանակարգերի թվով առաջատար է դարձել ռեփեր Քենդրիք Լամարը, նա ներկայացված է 11 կատեգորիայում: Կատարողը, որն անցյալ տարի արդեն ստացել է երկու «Գրեմմի», կպայքարի այնպիսի հեղինակավոր անվանակարգերում, ինչպիսիք են «Տարվա ալբոմը» (To Pimp A Butterfly ալբոմի համար) և «Տարվա երգը»:

Լավագույն ալբոմի կոչման համար պայքարելու են նաև Alabama Shakes ամերիկյան ռոք-խումբը, Քրիս Ստեպլտոնը, կանադացի կատարող The Weekend-ը և ամերիկուհի փոփ-կատարող Թեյլոր Սվիֆթը:

Սվիֆթը Blank Space կոմպոզիցիայիով ներկայացված է նաև «Տարվա երգը» կատեգորիայում: Նրա մրցակիցներն են Քենդրիք Լամարը, Little Big Town ամերիկյան խումբը, Չառլի Պուտը և բրիտանացի կատարող Էդ Շիրանը:

Նոր լավագույն կատարողի կոչման համար կպայքարեն ավստրալացի երգչուհի Քորթնի Բառնեթը, բրիտանացի երաժիշտ Ջեյմս Բեյը, քանթրի երաժշտության ամերիկացի կատարողներ Սեմ Հանթը և Թորի Քելլին, ինչպես նաև Մեգան Թրեյնորը:

Մրցանակը հանձնվում է 30 երաժշտական ժանրի և ուղղության 100-ից ավելի կատեգորիաներում: Սովորաբար, առավել մեծ ուշադրություն է դարձվում չորս անվանակարգի, որոնք պայմանականորեն համարվում են գլխավորները՝ երգը, ձայնագրությունը, ալբոմը և տարվա կատարողը, հաղորդել է ՌԻԱ Նովոստին: