Խմբագրական. ՀՀԿ-ն չի գիտակցում

Հասկանալի է, որ քաղաքական գործիչը, որը նաև կուսակցական է, խնդիր ունի նաև պաշտպանելու իր կուսակից գործընկերոջը, կամ էլ գոնե գործընկերոջ ակնհայտ սխալի դեպքում՝ խուսափելու գնահատական տալուց, բայց եթե խոսքն արդեն կուսակցության վարկանիշի անկման մասին է, կարծում եմ՝ ավելի խելամիտ կլիներ խախտել այդ սկզբունքը և հանդես գալ ճշմարտության կողմից: ՀՀԿ-ի վարկանիշն այսօր ցածր է, և դա՝ իրենց իսկ մեղքով, իրենց իսկ կուսակիցների տարբեր արարքների հետևանքով: Եթե այդ արարքներից շատերը ժամանակին գնահատականի արժանանային հենց ՀՀԿ-ի կողմից, եթե կուսակցության վարկաբեկող մի շարք անդամներ հենց ՀՀԿ-ի կողմից պատժվեին ու հեռացվեին իրենց շարքերից, այսօր ամենայն հավանականությամբ իշխող կուսակցությունն այլ վարկանիշ կունենար:

Հանրապետական իմ ընկերները, իհարկե, չեն համաձայնի ինձ հետ, կասեն, որ իրենք լավ էլ վարկանիշ ու հեղինակություն ունեն, բայց իրականությունն այլ բան է ցույց տալիս: Իրականությունն այն է, որ իրենց կուսակիցը չորրորդ իշխանության ներկայացուցիչներին կարող է «նախիր» անվանել, իսկ իրենք կխուսափեն դրան գնահատական տալուց: Իրականությունն այն է, որ Նժդեհի գաղափարախոսությունը կրող կուսակցության շարքերում տեղ չպետք է ունենան օլիգարխները, դա առնվազն անտրամաբանական է, դա հակասում է հենց կուսակցության գաղափարախոսությանը, որը իրականում լավն է, պարզապես այդ լավը թղթի վրա է մնում, կյանքի չի կոչվում:

Արդեն պարզ է, որ պատգամավոր Մհեր Սեդրակյանը լրագրողներից ներողություն չի պատրաստվում խնդրել, և չի էլ պատրաստվի, եթե չլինի կուսակիցների ճնշումը: Իսկ ՀՀԿ-ն լռում է, փորձում է փրկել իր կուսակցին, բայց մոռանում է, որ դրանով ևս մեկ աստիճանով իջեցնում է իր վարկանիշը: ՀՀԿ-ն չի գիտակցում, թե իրականում ինչը կամ որը իր համար կարող է ավելի կարևոր լինել:

Կարեն Վարդանյան