«Սասնա ծռեր» խմբավորման անդամներն ահաբեկիչներ չեն` վկայում է ԱԱԾ-ի պաշտոնական հաղորդագրությունը

Այսօր ՀՀ ազգային անվտանգության ծառայությունը (ԱԱԾ) հաղորդագրություն տարածեց, որ ՀՀ ոստիկանության պարեկապահակային (ՊՊԾ) գնդի տարածքի զավթման փաստի առթիվ 2016թ. հուլիսի 17-ին ազգային անվտանգության ծառայության քննչական վարչությունում հարուցված քրեական գործի շրջանակներում ձերբակալվել կամ կալանավորվել է 47 անձ: Սակայն այդ հաղորդագրության մեջ առավել ուշագրավը ոչ թե կալանավորվածների քանակն է (47, 45 թե 50' դրանից առանձնապես բան չի փոխվում), այլ այն, թե ՀՀ քրեական օրենսգրքի որ հոդվածներով է հարուցվել տվյալ քրեական գործը և որ հոդվածներով են մեղադրանքներ առաջադրվել նշված քր. գործով որպես մեղադրյալ ներգրավված անձանց: Ինչպես նշված է ԱԱԾ-ի հաղորդագրության մեջ, հիշյալ քրեական գործը հարուցվել է ՀՀ քր. օր.-ի 219-րդ հոդվածի («Շենքեր, շինություններ, տրանսպորտի, հաղորդակցության կամ կապի միջոցներ զավթելը») և 235-րդ հոդվածի («Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը») հատկանիշներով:

24 անձի տարբեր համակցություններով մեղադրանքներ են առաջադրվել ՀՀ քրեական օրենսգրքի 218-րդ («Պատանդ վերցնելը»), 219-րդ և 235-րդ հոդվածներով: Ինչպես ակնհայտ է, ինչպես քրեական գործի հարուցման, այնպես էլ մեղադրանքների առաջադրման առումով որևէ խոսք չկա ահաբեկչության մասին (ՀՀ քրեական օրենսգրքի 217-րդ հոդված), ինչի վերաբերյալ ավելի վաղ խոսում էին ՀՀ իրավապահ համակարգի որոշ ներկայացուցիչներ, քաղաքական գործիչներ և այլք:

Կարելի է ենթադրել, թե ահաբեկչության հոդվածով նրանց, նրանց մի մասին կամ հիշյալ 24-ից բացի, մնացյալ 23 անձանց մեղադրանք կարող է առաջադրվել հետագայում, նախաքննության ընթացքում, սակայն դժվար է պատկերացնել, թե նախաքննությունն իրականացնող մարմնին ինչ նոր փաստեր կարող են ի հայտ դառնալ, որ մինչ այժմ հայտնի չեն եղել (նկատի ունենանք, որ ՊՊԾ գնդի տարածքը, շինությունները, տրանսպորտային և կապի միջոցները գրաված «Սասնա ծռեր» խմբավորման արարքները եղել են ակներևության պայմաններում, նրանց, ինչպես նաև Հիմնադիր խորհրդարանի պահանջներն ունեցել են հրապարակային բնույթ):

Մի պահ ենթադրենք, թե սխալվում ենք, սակայն ուշադրություն դարձնենք ԱԱԾ հիշյալ հաղորդագրության վերջին պարբերությանը, որն ահաբեկչության մեղադրանքից հրաժարվելու առումով թերևս առավել կարևորն է.
«Սույն թվականի օգոստոսի 1-ին ազգային անվտանգության ծառայության քննչական վարչությունը գրավոր միջնորդություն է ներկայացրել ՀՀ գլխավոր դատախազություն՝ նշված քրեական գործը, ՀՀ քրեական դատավարության օրենսգրքի 190 հոդվածով նախատեսված քննչական ենթակայության կանոններին համապատասխան, նախաքննության մեկ այլ մարմնին հանձնելու վերաբերյալ»:

«Ըստ ՀՀ քրեական դատավարության օրենսգրքի 190-րդ հոդվածի 3-րդ մասի, «Նախաքննությունը Հայաստանի Հանրապետության քրեական oրենսգրքի 190, 217, 217.1 , 219-221, 224, 226, 233, 234, 250, 299, 302-307, 329, 330, 384-397.1 հոդվածներով նախատեսված հանցագործությունների վերաբերյալ գործերով կատարում են ազգային անվտանգության մարմինների քննիչները»: Այսինքն' 217-րդ հոդվածով («Ահաբեկչությունը») նախատեսված հանցագործության վերաբերյալ գործերով նույնպես' նախաքննությունը կատարում են ազգային անվտանգության մարմինների քննիչները, և եթե այսօր ԱԱԾ քննչական վարչությունը գրավոր միջնորդություն է ներկայացրել ՀՀ գլխավոր դատախազություն՝ նշված քրեական գործն իրենցից վերցնելու, նախաքննության մեկ այլ մարմնին հանձնելու վերաբերյալ, նշանակում է, որ Ազգային անվտանգության ծառայությունը ՀՀ ոստիկանության պարեկապահակային (ՊՊԾ) գնդի տարածքի զավթման փաստի առթիվ հարուցված քրեական գործի շրջանակում ձերբակալված, կալանավորված անձանց արարքներում ահաբեկչության հատկանիշներ չի տեսնում նաև առաջիկայում կամ այն 23 անձանց մասով, որոնց մեղադրանք դեռ նոր է առաջադրվելու կամ կարող է առաջադրվել:

Արթուր Հովհաննիսյան