Ինչ է սպասվում ՊՊԾ գնդի տարածքը գրաված «Սասնա ծռեր» խմբավորման անդամներին իրավական տեսանկյունից

ՀՀ նախագահ Սերժ Սարգսյանն օգոստոսի 1-ի իր արդեն հայտնի ելույթում նշել է նաև, որ «Ազգային անվտանգության ծառայությունը, Ոստիկանությունը, Պետական պահպանության ծառայությունը, Ներքին զորքերն իրենց հետևողական և համադրված գործողություններով ստիպեցին զինված խմբի անդամներին վայր դնել զենքը և հանձնվել իշխանություններին»:

Մինչ այդ կարծում էինք, թե «Սասնա ծռեր» զինված խմբի անդամներն իրենց հետ ԼՂՀ Ազգային ժողովի պատգամավոր, Արցախի հերոս Վիտալի Բալասանյանի բանակցությունների արդյունքում կամովին են վայր դրել զենքերը, ազատել իրենց զավթած ՀՀ ոստիկանության ՊՊԾ գնդի տարածքը, շենքերը և հանձնվել: Սակայն, եթե նրանք իրավապահների գործողությունների արդյունքում իրոք ստիպված են եղել վայր դնել զենքը և հանձնվել իշխանություններին, ինչպես նախագահն է ասել, ապա ՀՀ քր. օր.-ի 219-րդ հոդվածով («Շենքեր, շինություններ, տրանսպորտի, հաղորդակցության կամ կապի միջոցներ զավթելը») և 235-րդ հոդվածով («Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը») նախատեսված արարքներ կատարած «Սասնա ծռեր» զինված խմբավորման անդամները 219-րդ հոդվածի 4-րդ մասով և 235-րդ հոդվածի 5-րդ մասով չեն ազատվի տվյալ հանցանքների կատարման համար նախատեսված քրեական պատասխանատվությունից:

ՊՊԾ գնդի տարածքը և շենքերը գրաված «Սասնա ծռեր» խմբավորման անդամներին կամ նրանց մի մասին, ինչպես արդեն հայտնի է, մեղադրանք է առաջադրվել նաև ՀՀ քրեական օրենսգրքի 218-րդ հոդվածով («Պատանդ վերցնելը»):
Համաձայն նշված հոդվածի 4-րդ մասի, «Իր պահանջներից հրաժարված և պատանդին կամովին ազատ արձակած անձն ազատվում է քրեական պատասխանատվությունից, եթե նրա գործողություններն այլ հանցակազմ չեն պարունակում»:
Հայտնի է նաև, որ «Սասնա ծռեր» խմբավորման անդամները իրենց մոտ պահվող բոլոր ոստիկաններին ազատ արձակեցին: Ազատ արձակեցին նաև շտապ օգնության բուժաշխատողներից երկուսին (երկրորդի ազատ արձակման մասին չհայտարարեցին, բայց, ըստ էության, նա էլ է ազատ արձակվել, քանի որ հեռացել է զինված խմբի գիտությամբ ու թույլտվությամբ):

Ըստ մյուս երկու բուժաշխատողների, գիշերը օգտվելով զինված խմբի անդամների քնած լինելու հանգամանքից, իրենք են հեռացել ՊՊԾ գնդի տարածքից: Եթե մեղադրյալներին ու նրանց պաշտպաններին չհաջողվեց հիմնավորել, որ վերջին երկու բուժաշխատողները պարտադրաբար, ստիպողաբար չեն պահվել ՊՊԾ գնդի տարածքում, ապա այս առումով «Սասնա ծռեր» խմբավորման անդամների մի մասին հավանաբար չի հաջողվի խույս տալ ՀՀ քրեական օրենսգրքի 218-րդ հոդվածով նախատեսված պատասխանատվությունից: Առաջիկայում նրանցից ոմանց ոստիկանների սպանության համար նոր մեղադրանքներ կառաջադրվեն սպանության, իսկ տրանսպորտային միջոցները հրդեհելու համար՝ գույքը դիտավորությամբ ոչնչացնելու հոդվածներով, եթե, իհարկե, արդեն իսկ չեն առաջադրվել:

«Սասնա ծռեր» խմբավորման անդամների այն մասին, որոնց ներկայացված կլինի միայն ոչ մեծ կամ միջին ծանրության հանցանք կատարած լինելու մեղադրանք, հնարավոր կլինի քրեական պատասխանատվությունից ազատել իրադրության փոփոխման դեպքում, եթե առաջին անգամ են կատարել ոչ մեծ կամ միջին ծանրության հանցանք (ՀՀ քրեական օրենսգրքի 74-րդ հոդված):
Հետագայում, օրինական ուժի մեջ մտած մեղադրական դատավճռից հետո «Սասնա ծռեր» խմբավորման անդամները պատժից կարող են ամբողջությամբ ազատվել միայն ներման ակտով: Համաձայն ՀՀ քրեական օրենսգրքի 83-րդ հոդվածի, «Հանցագործության համար դատապարտված անձը ներման ակտով կարող է լրիվ կամ մասնակիորեն ազատվել ինչպես հիմնական, այնպես էլ լրացուցիչ պատժից, կամ պատժի չկրած մասը կարող է փոխարինվել ավելի մեղմ պատժատեսակով, կամ կարող է վերացվել դատվածությունը»:

Ա. Հովհաննիսյան