«Սերժ Սարգսյանը չի ասել, որ հող չենք հանձնելու, այլ ասել է՝ զիջումները միակողմանի չեն լինելու». Նիկոլ Փաշինյան (տեսանյութ)

ԱԺ պատգամավոր, «Քաղաքացիական պայմանագիր» կուսակցության վարչության անդամ Նիկոլ Փաշինյանը ֆեյսբուքյան իր էջում պատասխանեց քաղաքացիների հարցերին.

Նա նշեց, որ «Սասնա ծռերի» կողմից ոստիկանության Պարեկապահակային գնդի շուրջ ստեղծված ճգնաժամը համընկավ այն ժամանակահատվածի հետ, երբ պետք է կողմերի միջև տեղի ունենային ԼՂ խնդրի շուրջ աշխատանքային քննարկումները: 

Ֆեյսբուքյան օգտատերերից մեկը անդրադառնալով Նախագահ Սերժ Սարգսյանի ելույթի այն հատվածին, որը վերաբերում էր ԼՂ ազատագրված տարածքների զիջմանը, հարցրեց, թե արդյոք պատերազմի հավանականություն այս պահին տեսնո՞ւմ է ԱԺ պատգամավորը:

«Սերժ Սարգսյանը չի ասել, որ հող չենք հանձնելու, հակառակը՝ հստակ ասել է, որ իշխանությունը պատրաստակամ է ազատագրված տարածքներից վերադարձնել, բայց միակողմանի չեն լինելու զիջումները»,- ասաց Փաշինյանը՝ հավելելով, որ եթե հող հանձնվի ադրբեջանական կողմին, ապա հայկական կողմը դրա դիմաց ինչ-որ բան է ստանալու:

«Երբ Սերժ Սարգսյանն ասում է, որ Արցախը չի լինելու Ադրբեջանի կազմում, չի շեշտում Արցախի ժողովրդի ինքնորոշման իրավունքի մասին, ինչն ամենևին էլ պատահական չէ, որովհետև իմ ունեցած տեղեկություններով ներկայումս գործող փաթեթը էականորեն տարբերվում է հետևյալ դետալով, որ այնտեղ խոսք է գնում Ղարաբաղի միջանկյալ կարգավիճակի մասին՝ առանց շեշտելու ինչ-որ ժամկետներ: Այն ամենապրոբլեմատիկ կետերից մեկն է, ինչ վերաբերում է պատերազմի հավանականությանը, քառօրյա պատերազմը, ու դրանից առաջ ու հետո ժամանակաշրջանը ցույց տվեց, որ անընդհատ պատերազմական վիճակում ենք գտնվում, այո պատերազմի հավանականությունն այնպիսին է, որ ցանկացած պահի կարող է կրկնվել»,-շեշտեց Նիկոլ Փաշինյանը: