Ինչպես է կարողանում թաքնվել Գարեգին Չուգասզյանը

«Սասնա ծռեր» զինված խմբավորման կողմից ՀՀ ոստիկանության ՊՊԾ գնդի տարածքն ու շինությունները գրավելուց ութ օր հետո՝ հուլիսի 25-ին, ՀՀ քննչական կոմիտեի ֆեյսբուքյան էջում տեղեկատվություն հրապարակվեց այն մասին, որ Գարեգին Չուքասզյանը փոխել է բնակության վայրը և չի ներկայացել վարույթն իրականացնող մարմնին (ՀՀ քննչական կոմիտեի ՀԿԳ քննության գլխավոր վարչություն)՝ խախտելով ընտրված խափանման միջոցի պահանջները: Խոսքը «Հիմնադիր խորհրդարանի» նախագահ Գարեգին Չուգասզյանի մասին է:

ՀՀ քննչական կոմիտեի հրապարակած տեղեկատվության համաձայն, «ՀԿԳ քննության գլխավոր վարչության վարույթում քննվող քրեական գործով անհրաժեշտություն է առաջացել մեղադրյալ Գարեգին Չուքասզյանի և մի քանի այլ անձանց մասնակցությամբ իրականացնել քննչական գործողություններ և օրենքով սահմանված կարգով ուղարկվել են ծանուցագրեր։

Գ. Չուքասզյանը, ում նկատմամբ՝ որպես մեղադրյալի, խափանման միջոց էր ընտրվել ստորագրություն չհեռանալու մասին, չի ներկայացել վարույթն իրականացնող մարմնին և փոխել բնակության վայրը՝ առանց այդ մասին պատշաճ ծանուցելու նախաքննական մարմնին։ Այդպիսով խախտվել է ընտրված խափանման միջոցի՝ օրենքով սահմանված պահանջները։ Դատարանի որոշմամբ մեղադրյալ Չուքասզյանի նկատմամբ որպես խափանման միջոց է ընտրվել կալանավորումը, նրա նկատմամբ հայտարարվել է հետախուզում»։

Հաջորդ օրը մամուլում տեղեկատվություն հրապարակվեց այն մասին, որ Չուգասզյանն անհետացել է «Սասնա ծռեր»-ի կողմից ՊՊԾ գունդը գրավելուց հետո: Եթե դա իրոք այդպես է, ապա պարզ է, որ «Հիմնադիր խորհրդարանի» նախագահին հաջողվել է շատ արագ շարժվել է՝ թե՛ Հայաստանում թաքնվելու առումով, թե՛, հատկապես, Հայաստանից մեկնելու առումով: Այնքան արագ, որ նույնիսկ ԱԱԾ-ին չի հաջողվել կանխել նրա անհետանալը: Չուգասզյանը չէր կարող կանխատեսած չլինել, որ իր հետևից գալու են, եթե նույնիսկ ՊՊԾ գնդի տարածքի ու շինությունների գրավման հետ որևէ առնչություն էլ չունենար, «Հիմնադիր խորհրդարանի» նախագահը լինելը դրա համար բավարար էր:

Ըստ ՀՀ քննչական կոմիտեի պարզաբանման, Գ. Չուգասզյանի նկատմամբ հետախուզում է հայտարարվել դեռ 2015թ. ապրիլի 24-ին ընդառաջ զանգվածային անկարգությունների նախապատրաստման համար հարուցված քրեական գործի շրջանակներում քննչական գործողություններ կատարելու համար չներկայանալու կապակցությամբ։ Այո, դա ճիշտ է, Չուգասզյանին, Ժիրայր Սեֆիլյանին և էլի մի քանի անձանց այն ժամանակ կալանավորել էին, սակայն մի քանի օրից կալանքը փոխարինել էին այլ խափանման միջոցով՝ չհեռանալու մասին ստորագրությամբ, որից հետո նրանք ազատ էին արձակվել։ Սակայն, դրանից հետո Գ. Չուգասզյանին առանձնապես չէին անհանգստացրել, համենայն դեպս, վերջին շրջանում, որքան ինձ հայտնի է, նրան հարցաքննելու կամ այլ քննչական գործողություն կատարելու համար ՀՀ քննչական կոմիտե չէին կանչել, ու դժվար էլ թե առաջիկայում կանչեին, եթե չլիներ հուլիսի 17-ի հանրահայտ դեպքը: Թերևս բոլորին էլ պարզ է, որ նախորդ տարվա քրեական գործն այժմ ուղղակի պատրվակ է եղել նրան ծանուցագիր ուղարկելու, կանչելու համար, իսկ ներկայանալու պարագայում նա արդեն հայտնվելու էր ԱԱԾ-ում ու պատասխանելու էր «Սասնա ծռեր»-ի անդամների ու նրանց գործողությունների առնչությամբ քննիչների հարցերին, կամ էլ հրաժարվելու էր պատասխանել այդ հարցերին:

Ինչպես այսօր Քննչական կոմիտեից հայտնի դարձավ Լուրեր.com-ին, 2015թ. ապրիլի 24-ին ընդառաջ զանգվածային անկարգությունների նախապատրաստման համար հարուցված քրեական գործը վերջերս (համենայն դեպս, Քննչական կոմիտեի հուլիսի 25-ի հիշյալ տեղեկատվությունից հետո) Քննչական կոմիտեից վերցվել ու տրվել է ՀՀ հատուկ քննչական ծառայությանը՝ հետագա քննությունը շարունակելու համար: Սա թերևս հուշում է, որ ՀՀ գլխավոր դատախազությունում կամ Հատուկ քննչական ծառայությունում ինչ-որ կապ են տեսնում 2015թ. ապրիլի 24-ին ընդառաջ զանգվածային անկարգությունների նախապատրաստման և 2016թ. հուլիսի 17-ին ՊՊԾ գնդի տարածքի ու շինությունների գրավման, դրա հետ կապված զանգվածային անկարգությունների փաստի առթիվ հարուցված քրեական գործի կամ գործերի միջև:

Թեև Գարեգին Չուգասզյանի նկատմամբ հետախուզում հայտարարելուց անցել է մոտ երկու շաբաթ կամ ավելի, սակայն իրավապահներին դեռ չի հաջողվել հայտնաբերել նրան՝ չնայած, որ հայտնաբերելու համար, ըստ Լուրեր.com-ի աղբյուրների, մոբիլիզացված են ոստիկանության և ԱԱԾ-ի ջանքերը: Այս պահին դժվար է ասել' Չուգասզյանը կդառնա՞ անորսալի Ջոն, թե ոչ, բայց այն, որ իրավապահները չնայած նրան հայտնաբերելու իրենց մեծ ցանկությանը, դեռ չեն կարողացել իրականություն դարձնել այդ ցանկությունը, հուշում է, որ Գարեգին Չուգասզյանը կամ հասցրել է ժամանակին մեկնել Հայաստանից, կամ էլ, եթե Հայաստանում է, չհայտնաբերվելու համար կիրառում է ինչ-որ հնարքներ: Պարզաբանեմ, թե ինչ նկատի ունեմ…

Ինչպես հայտնի է, Գարեգին Չուգասզյանն ընդհատակից արդեն հանդես է եկել մի քանի հայտարարություններով, դիմումներով, վերջինը՝ Պավլիկ Մանուկյանին ուղղված դիմում-խնդրանքն էր՝ հացադուլը դադարեցնելու վերաբերյալ: Միաժամանակ հայտնի է, որ թե՛ ԱԱԾ-ն, թե՛ ոստիկանությունն ունեն համապատասխան ստորաբաժանումներ ու սարքավորումներ, որոնք թույլ են տալիս բավական մեծ ճշտությամբ պարզել, թե անձը որտեղ է եղել համացանց մտնելու կամ բջջային հեռախոսով զանգ կատարելու պահին: Սա նշանակում է, որ Գ. Չուգասզյանը կամ օգտվում է բոլորովին այլ անձի անվամբ ձեռք բերված բջջային հեռախոսի կամ մոդեմի համար նախատեսված համացանց մուտք գործելու քարտից (եթե նոթբուքից է իր հայտարարություններն ուղարկում) ու դրանով կապվում է իրավապահների տեսադաշտում չգտնվող անձի (անձանց) հետ, կամ էլ, եթե սովորական համակարգչից է իր հայտարարությունները, դիմումներն ուղարկում, օգտվում է ինչ-որ հատուկ սարքից, որը թույլ է տալիս ամեն անգամ փոխել IP հասցեն, ներկայացնել կեղծ հասցե: Համենայն դեպս, հայտնի է, որ Գարեգին Չուգասզյանը ՏՏ ոլորտի մասնագետ է և սիստեմային վերլուծաբան: Գուցե նրա մասնագիտական կարողություննե՞րն են թույլ տալիս նրան առայժմ չհայտնաբերվել:

Իհարկե, հնարավոր է նաև, որ իրավապահներն արդեն հայտնաբերել են Գ. Չուգասզյանին ու պահում են իրենց շուրջօրյա հսկողության տակ, սակայն չեն շտապում ձերբակալել, որպեսզի հնարավորինս բացահայտեն նրա կապերն այլոց հետ:
Ի դեպ, ինչպես արդեն հայտնի է, Գ. Չուգասզյանի հետ գրեթե միաժամանակ ընդհատակ է անցել նաև «Հիմնադիր խորհրդարան»-ի մամուլի պատասխանատու Սյուզան Սիմոնյանը, և դատելով նրանից, որ նա ևս առայժմ կարողանում է հաջողությամբ թաքնվել, կարելի է ենթադրել, որ նա կամ Չուգասզյանի հետ նույն վայրում է, կամ էլ գործում է բավական զգույշ:

Արթուր Հովհաննիսյան