Տրագիկոմեդիա՝ բազում արարներով…

Պարզվում է՝ մինչ աշխարհն ու տարածաշրջանը շարունակում են եռալ, մինչ Հայաստանն օրեցօր ստիպված է լինում բախվել նորանոր մարտահրավրների ու սպառնալիքների, «հարգելի» կառավարությունը, կրկին իր ոճի մեջ, շարունակում է մտահոգվել այն հարցով, թե առաջիկա ընտրություններն ինչպիսի մեխանիզմների կիրառությամբ են անցկացվելու. որքա՞ն մեծ է լինելու հավանականությունը, որ ներկայիս վարչակարգը, էլիտան, ի վիճակի են լինելու, առանց ավելորդ արյուն թափելու, վերարտադրվել. սա, հասկանում եք, դարի հարցն է, Հայաստանի գոյության առհավատչյան…

Ինչպես հայտնի է, նոր Ընտրական օրենսգրքով նախատեսված նորամուծություններից մեկն էլ այն էր, որ դրանով նախատեսվում էր ներդնել ընտրական ցուցակների կազմման նոր համակարգ՝ դրանցում ընդգրկելով միայն նույնականացման քարտ ստացած կամ ստանալու համար դիմած ՀՀ քաղաքացիներին: Ըստ այդմ՝ նախատեսվում է նույնականացման քարտ տրամադրելիս քաղաքացիներից վերցնել նրանց տասը մատների մատնահետքերը:

Նշենք, որ ԸՕ համապատասխան փոփոխությունը պետք է ուժի մեջ մտնի սեպտեմբերի 1-ից հետո, ու մինչ այդ համապատասխան համակարգն արդեն ձեռքբերված և ներդրված պետք է լինի: Այս ամենը հատկապես կարևորվում է այն առումով, որ Հայաստանի ընտրողների ցուցակները պատշաճ տեսքի հնարավոր կլինի բերել, քանի որ դրանում ներառված կլինեն միայն երկրում գտնվող ընտրողների տվյալները՝ բացառելու ասենք մեռելների, Հայաստանից 50 տարի բացակայող քաղաքացիների կողմից իրականացվելիք «քվերակությունը»:

Բայց արի ու տես, որ կետն այս ակնհայտորեն դուր չի եկել մեր իշխողներին, ու նրանք, ըստ էության, զգալով սպառնալիք սեփական կարիերայի նկատմամբ, ուղիներ են սկսել որոնել՝ կետն այս անվերադարձ վիժեցնելու հույսով. համակարգի ներդրման համար անհրաժեշտ սարքեր արտադրող ընկերությունները հրաժարվում են 1-2 ամսում խնդիրը լուծելու տարբերակից: Ու, եթե նույնականացման քարտի տրամադրման համար անհրաժեշտ մատնահետքերի թիվը, որ պետք է, ըստ նոր կարգի, վերցվի բոլոր 10 մատներից, չնվազեցվի' թողնելով գործող' 2 մատներից վերցվելիք տարբերակը, ապա ՀՀ կառավարության համար միանգամայն «լեգիտիմ» հնարավորություն կստեղծվի հրաժարվելու նոր համակարգը ներդնելուց. մասնագետներն իրենք են խոստովանում, որ 10 մատից մատնահետք վերցնելու պայմաններում 1-2 ամսում հնարավոր չի լինի համակարգ ներդնել:

Դե ինչ, հիմա հասկացա՞ք՝ որն է հայաստանյան հասարակությանը հուզող, հայոց պետականության համար գերկարևոր թիվ մեկ խնդիրը… Փաստորեն՝ մինչ նույն Ադրբեջանն աննախադեպ ակտիվությամբ փորձում է Անդրկովկասում ամրացնել սեփական դիրքերն ու հաջողությամբ իրականցնում է աշխարհաքաղաքական մեծ խաղից օգուտներ քաղելու սեփական պլանը՝ վերածվելով համաշխարհային նշանակության տարանցիկ երկրի, մեր խելոքները, որոնց կյանքի միակ նպատակը դարձել է ժողովրդի հաշվին միլիարդներ դիզելը, օրնիբուն ուղեղներին զոռ են տալիս մեկ գերխնդիր լուծելու նպատակով՝ վերարտադրվելու:

Ա՛յ ոչ բարով պարոններ, ո՞վ չգիտի, որ թեկուզ Շվեյցարիայի ընտրական օրենսգիրքն էլ բերեք, պրոյեկտեք Հայաստանի վրա, էլի ոչինչ չի ստացվելու, էլի շարունակելու եք ընտրակաշառք բաժանել ու սրան-նրան հոգեբանական տեռորի ենթարկելու գնով ձայներ կորզելու պախարակիչ պրակտիկան կիրառել: Համարձակությու՛ն ունեցեք, ձեր օտարերկրյա գործընկերներին ասեք, որ չբերեն ու նոր օրենսգրքեր չառաջարկեն, միևնույն է՝ դուք անդրդվելի եք, միևնույն է, դուք ձեր սև գործն անելու եք…

Անհերքելի է՝ Հայաստանի ներկայիս անբարեհույս վիճակի միակ ու հիմնական մեղավորներն էլիտայի այն բարձրաստիճան ներկայացուցիչներն են, որոնք, տարված բացառապես անձնական շահերով ու փող աշխատելու հիվանդագին մոլուցքով, պատրաստ են անգամ մի ողջ երկիր կործանել, միայն թե շարունակեն պաշտոնավարել: 

Քանի կար՝ փող չէին ճարում, հիմա էլ վերոհիշյալ խնդիրն են մեջտեղ բերել: Լա՛վ, ո՞ւմ են փորձում հիմարացնել, ո՞ւմ աչքերին են փորձում «թոզ փչել», ժողովրդի՞. չի ստացվի…

Դավիթ ԲԱԲԱՆՈՎ