Համահայկական կրթական 7-րդ խորհրդաժողովն ընդունել է բանաձև

Համահայկական կրթական 7-րդ խորհրդաժողովն ավարտել է աշխատանքը: Խորհրդաժողովի արդյունքների հիման վրա ընդունվել է բանաձև, որն ուղղորդիչ է դառնալու ՀՀ կրթության և գիտության նախարարության համար' մոտակա երկու տարիների ընթացքում: Համաձայն բանաձևի' խորհրդաժողովին բարձրացված հիմնախնդիրների լուծման նպատակով ներկայացվել են մի շարք առա ջարկություններ, մասնավորապես, մշակել Սփյուռքի ուսուցիչների հավաստագրման, մանկավարժական գործունեության մշտադիտարկման, ատեստավորման մեխանիզմներ, շարունակել Սփյուռքի մանկավարժների ամենամյա վերապատրաստումը Հայաստանում և համայնքներում (ինչպես առկա, այնպես էլ հեռավար)' արդիականացնելով դասընթացների ծրագրերը, բովանդակությունն ու կազմակերպման ձևերը:

Ինչպես տեղեկացրին ՀՀ կրթության և գիտության նախարարությունից, առաջարկություն է հնչել հետամուտ լինել Հայաստանի կողմից տրվող կրթական փաստաթղթերի, կոչումների և վկայականների միջազգային ճանաչմանը, ինչպես նաև տեղական մակարդակով ուսուցիչների վերապատրաստման, որակավորման բարելավման կամ լրացուցիչ մասնագիտացման նպատակով օգտագործել տվյալ երկրի բարձրագույն կրթական հաստատությունների հնարավորությունները: Բացի այդ, համաձայն բանաձևի' առաջարկվել է Սփյուռքի մեկօրյա ուսումնական հաստատությունների շրջանավարտների համար մշակել հայագիտական առարկաների քննությունների կազմակերպման եղանակներ, ուսումնասիրություններ իրականացնել Սփյուռքի սովորողների և ուսուցիչների շրջանում և դրանց արդյունքների հիման վրա մշակել հոգեբանական աջակցության և վերականգնողական աշխատանքների ծրագիր:

Ըստ մեկ այլ առաջարկի' նախատեսվում է մեկօրյա դպրոցներում աշակերտների ուսւմնական պարապմունքներին զուգահեռ դասընթացներ կազմակերպել ծնողների համար՝ հաշվի առնելով նրանց ճանաչողական, կրթական և այլ պահանջմունքները, ինչպես նաև վերաիմաստավորել մեկօրյա դպրոցների դերը՝ որպես խնդիր դիտելով ոչ միայն սովորողներին գրաճանաչ դարձնելը, այլև անձի բազմակողմանի զարգացումը: Համաձայն բանաձևի հաջորդ կետի' առաջարկ է հնչել ՀՀ բարձրագույն ուսումնական հաստատություններում սփյուռքահայ ուսուցիչների համար անհրաժեշտ պայմաններ ստեղծել համապատ ասխան որակավորմամբ մագիստրոսական կրթություն ստանալու համար:

ՀՀ կառավարության կողմից մշակութային մասնագիտություններով անվճար ուսուցման տեղեր տրամադրել սփյուռքահայերին, ՀՀ կրթության և գիտության նախարարությանը կից ստեղծել Սփյուռքի դպրոցների կրթական խնդիրներով զբաղվող գիտամեթոդական հանձնաժողով, որը կիրականացնի դասագրքերի, ուսումնական և մեթոդական այլ նյութերի փորձաքննություն, գործածության երաշխավորում: Բացի այդ, առաջարկվել է նպաստել ուսումնական նյութերի էլեկտրոնային պաշարների միասնական շտեմարանի հարստացմանը, ապահովել Հայաստանում հրատարակվող գրականության մասին տեղեկատվության տարարումը, ՀՀ կրթության և գիտության նախարարության կողմից կազմակերպվող նկարչական մրցույթ-փառատոնի շրջանակներում նկարչության ուսուցիչ չունեցող դպրոցների սաների համար իրականացնել առցանց դասեր:

Բանաձևի եզրափակիչ մասում առաջարկ է հնչել արտասահմանյան բուհերում հայոց լեզու ուսումնասիրող ուսանողների համար ստեղծել Հայաստանում մասնագիտական գիտելիքների ընդլայնման, ինչպես նաև ընդհանուր ճանաչողական ծրագրեր, քայլեր ձեռնարկել տարիքային խմբերի աշակերտների համար առցանց տարաբնույթ մրցույթներ կազմակերպելու ուղղությամբ, և վերջապես, նպաստել Հայաստանի հայագետների աշխատանքների օտար լեզուներով հրատարակմանը՝ արտասահմանյան երկրների և Հայաստանի հայագետների համագործակցությունն ամրապնդելու նպատակով: