Երևանի մնջախաղի պետական թատրոնի շենք ունենալու խնդիրը շարունակում է չլուծված մնալ

Երևանի մնջախաղի պետական թատրոնի շենք ունենալու խնդիրը շարունակում է մնալ չլուծված: Լրագրողները հերթական անգամ Մշակույթի նախարարության ներկայացուցչից հետաքրքրվեցին, թե ինչ նորություն կա այդ գործընթացից: ՀՀ մշակույթի նախարարի տեղակալ Ներսես Տեր-Վարդանյանը տվեց անորոշ պատասխան:

«Ես կարծում եմ, որ նորություն առաջին հերթին թատրոնի գեղարվեստական ղեկավար Ժիրայր Դադասյանը կունենա ձեզ փոխանցելու, եթե այդպիսի բան լինի, ապա դրա մասին դուք տեղեկություն կստանաք: Ամեն դեպքում ես շատ ուրախ եմ, որ շենքի բացակայությունը թատրոնի գործունեությանը չի խանգարում»,- ասաց Մշակույթի փոխնախարարը:

Երևանի մնջախաղի պետական թատրոնի գեղարվեստական ղեկավար Ժիրայր Դադասյանը նշեց, որ թատրոնի գործունեությունն այնքան ընդգրկուն է, որ արդեն ընդգծվում է տարածք ունենալու հանգամանքը:

«Այնպես, ինչպես Մնջախաղի միջազգային փառատոնը տեսանելի դարձավ ու հնարավորություն ստեղծվեց, որ այն ընդլայնվի, վստահ եմ, որ այդպես էլ կնկատվի այն աշխատանքը, որը ծավալում է Մնջախաղի թատրոնը: Այդ դեպքում ուղղակիորեն կդառնա խնդիր օր առաջ կարգավորելու տարածքի հարցը: Եթե տարածքի խնդիրը լուծվի, ապա մենք ավելի մեծ ռեսուրսով կսկսենք աշխատանել: Մենք պատրաստվում ենք ընդլայնել մեր գործունեությունը, շուտով Ստեփանակերտում կունենանք ստուդիա: Ինչո՞ւ է դա այդպես, որովհետև մնջախաղը թատերական արվեստի ամենահասկանալի տեսականերից մեկն է և տարածվում է ամբողջ աշխարհում: Ես հավատացած եմ, որ անպայման մեր շենքի խնդիրը լուծելու հնարավորություն է ստեղծվելու»,-ասաց Ժիրայր Դադասյանը: