Ներգնա զբոսաշրջության ոլորտում մի փոքր աճ ունեինք, բայց երկրորդ կիսամյակում ամեն ինչ ջուրն է լցվելու

Ըստ ստացված հաշվետվությունների տվյալների և հետազոտությունների արդյունքում ձևավորված փորձագիտական գնահատումների, 2016թ. հունվար-հունիսին Հայաստանի Հանրապետություն է ժամանել 501 118.4 զբոսաշրջիկ կամ 2015թ. նույն ժամանակաշրջանի նկատմամբ ցուցանիշն աճել է 2.4%-ով:

Լուրեր.com-ը ՀՀ ազգային վիճակագրական ծառայությունից տեղեկացավ նաև, որ 2016թ. հունվար-հունիսին զբոսաշրջության նպատակով մեր հանրապետությունից մեկնել է 470 693 մարդ: Հիշյալ նպատակով մեր հանրապետությունից մեկնածների քանակը 2015թ. համապատասխան ժամանակաշրջանի համեմատ աճել է 1.2%-ով:

Ներգնա և արտագնա զբոսաշրջիկների ընդհանուր թվաքանակի հաշվարկման համար հիմք են հանդիսացել սահմանային անցման կետերում ուղևորների հաշվառման արդյունքում արձանագրված` ՀՀ ժամանողների և ՀՀ-ից մեկնածների թվաքանակի վերաբերյալ տեղեկատվությունը` ստացված ՀՀ ազգային անվտանգության ծառայության ՀՀ սահմանային էլեկտրոնային կառավարման տեղեկատվական համակարգով, ինչպես նաև ՀՀ էկոնոմիկայի նախարարության, Հայաստանի ազգային մրցունակության հիմնադրամի, Հայաստանում դոնոր կազմակերպությունների` Գերմանիայի միջազգային համագործակցության ընկերության (GIZ) և ԱՄՆ ՄԶԳ Ձեռնարկությունների զարգացման և շուկայի մրցունակության (USAID EDMC) ծրագրի համագործակցությամբ 2013թ. իրականացված «Ժամանողների և մեկնողների ընտրանքային հետազոտության» արդյունքները:

Ըստ ՄԱԿ-ի զբոսաշրջության համաշխարհային կազմակերպության (ԶՀԿ) մեթոդաբանության, միջազգային զբոսաշրջիկ է համարվում ցանկացած անձ, որը հանգստանալու, բուժվելու, հարազատներին այցելելու, գործնական, կրոնական կամ այլ նպատակներով ճանապարհորդում է իր հիմնական բնակության վայրից մեկ այլ վայր ոչ պակաս քան 24 ժամ և ոչ ավել, քան անընդմեջ 1 տարի ժամանակով: Այսինքն` նրա հիմնական նպատակը ճանապարհորդելն է, այլ ոչ թե աշխատանքային գործունեությամբ զբաղվելը, որի դեպքում ուղևորության համար վճարումները կկատարվեին ժամանած վայրում աշխատանքային գործունեությունից ստացված ֆինանսական միջոցների հաշվին:

Եթե այս տարվա առաջին կիսամյակում մեր հանրապետության զբոսաշրջության ոլորտում փոքր աճ է գրանցվել, ապա երբ ամփոփվեն երկրորդ կիսամյակի արդյունքները և տեսնենք ներգնա զբոսաշրջության ցուցանիշի էական նվազում, չպետք է զարմանանք: «Սասնա ծռեր» զինված խմբավորման կողմից ՀՀ ոստիկանության ՊՊԾ գնդի տարածքի և շինությունների գրավումը, դրանից հետո ստեղծված լարված իրավիճակը, որը Երևանում առ այսօր դեռ ամբողջությամբ վերացված չէ, ինչպես նաև «Սասնա ծռեր»-ի զինյալ անդամների հիշյալ գործողությանը իշխանությունների տված սխալ գնահատականը` ահաբեկչություն, ուղղակի չեն կարող բացասաբար չազդել ներգնա զբոսաշրջության ցուցանիշի վրա: