Հայաստանում այս տարվա առաջին կիսամյակում արտադրվել է 696 պլանշետ և 450 բջջային հեռախոս

2016թ. հունվար-հունիս ամիսներին Հայաստանի Հանրապետությունում արտադրվել է 696 պլանշետ և 450 բջջային հեռախոս՝ այն դեպքում, երբ նախորդ տարվա նույն ժամանակահատվածում դրանցից չի արտադրվել ոչ մի հատ: Նշված բջջային հեռախոսներից 250-ն արտադրվել է հունիսին: ՀՀ ազգային վիճակագրական ծառայությունից Լուրեր.com-ը տեղեկացավ նաև, որ զուգահեռաբար նվազել է համակարգիչների արտադրությունը. 2015թ. հունվար-հունիսին՝ 862 հատ, այս տարվա առաջին կիսամյակում՝ 465 հատ:

Մեքենաների և սարքավորանքների, այդ թվում նաև էլեկտրասարքավորանքների ապրանքախմբում աճ է գրանցվել նաև օպտիկա-մեխանիկական սարքերի ու սարքավորումների արտադրության բնագավառում՝ 2015թ. առաջին կիսամյակի 2688-ի փոխարեն, այս տարվա հունվար-հունիսին դրանցից արտադրվել է 2858 հատ, ռելեների արտադրության բնագավառում' 180 700-ի փոխարեն, 214 000 հատ, էլեկտրական հաշվիչների արտադրության բնագավառում՝ 1828-ի փոխարեն, 6197 հատ, ջրային հաշվիչների արտադրության բնագավառում՝ 6935-ի փոխարեն, 9609 հատ:

2000 հատով աճել է դրոշմված ալյումինե ամանեղենի արտադրությունը (2015թ. առաջին կիսամյակում արտադրվել է 2300 հատ), ցածրավոլտ էլեկտրական (մինչև 1000 Վ) մալուխների արտադրությունը 2015թ. առաջին կիսամյակի համեմատ (49 տոննա) աճել է 61.4 տոննայով և հասել 110.4 տոննայի: