Իբր թե գները նվազել են. ՀՀ ազգային վիճակագրական ծառայության հրաշքներից, կամ՝ ինչ ուզում, ասում են

Այս շաբաթվա ընթացքում հանդես գալով մամուլի ասուլիսով, ՀՀ ազգային վիճակագրական ծառայության նախագահի խորհրդական Գուրգեն Մարտիրոսյանը ներկայացրել է Հայաստանի սպառողական շուկայում 2016թ. հունվար-հուլիս ամիսներին իրենց գրանցած գների փոփոխությունները:

«2016 թվականի հուլիսին, հունիսի համեմատ, 10 ապրանքային խմբում արձանագրվել է գնանկում, իսկ 3 ապրանքային խմբում արձանագրվել է գնաճ,- ասել է Գուրգեն Մարտիրոսյանը:- Առավել բարձր գնաճ արձանագրվել է ձվի, շաքարավազի շուկայում և ոչ մոբիլ ապրանքախմբում: Գնանկում է արձանագրվել հացամթերքի, մսամթերքի, կաթնամթերքի, ձկնամթերքի գծով: Նվազել են նաև կենդանական և բուսական յուղերի, սուրճի, թեյի, կակակոյի, հրուշակեղենի և այլ մթերքների գները»:

Այո, հատկապես ձվի ապրանքային շուկայում գնաճը շատ մեծ է եղել. եթե հունիսին 50 դրամով հնարավոր էր գնել ամենամեծ չափի ձվերը, ապա հուլիսին դրանց գինը բարձրացվեց 75 դրամի: Ամբողջությամբ արտադրողների՞ կողմից, թե նաև իրացման ցանցի, չգիտեմ, բայց այս կապակցությամբ ՀՀ տնտեսական մրցակցության պաշտպանության պետական հանձնաժողովի ոչ հայտարարությունը տեսանք, ոչ գործը, ոչ էլ որոշումը, կարծես այս մարմինն ընդհանրապես գոյություն չուներ:

Հիմա անդրադառնամ պարոն Մարտիրոսյանի ասածին, թե գնանկում է արձանագրվել հացամթերքի, մսամթերքի, կաթնամթերքի, ձկնամթերքի գծով: Կաթնամթերքի գնանկմանը տեղյակ չեմ, ինչին տեղյակ չեմ, դրա մասին չեմ գրում, կարող եմ միայն ասել, որ 1 լիտր տնական մածունը հունիսին էլ եմ 300 դրամով գնել, հուլիսին էլ, սակայն հասկանալի է, որ կաթնամթերքը միայն մածունը չէ, իսկ մածնի առումով էլ ՀՀ ազգային վիճակագրական ծառայությունը միայն մեկ վաճառակետում ու միայն մեկ արտադրողի ապրանքի գների դիտարկում, հաշվարկներ չի իրականացնում: Անկեղծ ասած, չեմ նկատել նաև մսամթերքի գների անկում, տավարի 1 կգ միսը թե՛ հունիսին, թե՛ հուլիսին 2300-2350 դրամ է եղել երևանյան այն խանութներում, որտեղից դրանք գնել եմ, հավանաբար առողջության համար վտանգավոր, գենմոդիֆիկացված սոյայով ու էլ չգիտես ինչով լցոնված որոշ, համեմատաբար էժանագին, նրբերշիկների գինն է որոշ չափով նվազել: Ձկնամթերքի գների նվազում նույնպես չեմ նկատել, ձկան պահածոների գները չեն նվազել, շուկաների մոտ և այլուր վաճառվող, Սևանա լճից որսագողությամբ ձեռք բերված սիգի գները նույնպես չեն նվազել (հետաքրքիր է' հիշյալ ծառայությունը գողոնը' հանցավոր ճանապարհով ձեռք բերված ապրանքը նույնպե՞ս ընդգրկում է իր դիտարկումներում ու հաշվարկներում…):

Այնուամենայնիվ, վստահաբար ասել, որ մսամթերքի, կաթնամթերքի, ձկնամթերքի գնանկում չի եղել, վստահաբար չեմ կարող ասել, քանի դեռ ինձ ամբողջությամբ հայտնի չէ, թե ԱՎԾ-ն այդ ապրանքախմբերի որոշակի ինչ ապրանքների դիտարկում է իրականացրել, դրանց ինչ գներ գրանցել և որտեղ: Սակայն, կարող եմ ասել, որ, համենայն դեպս, Երևանում հուլիսին, հունիսի համեմատ, հացամթերքի գների նվազում չի եղել: Հակառակը' այն գները, որ ԱՎԾ-ն գրանցում է պաշտոնապես, օրինակ, 300 գրամ ներկայացվող հացի համար, իրականությանը չեն համապատասխանում, քանի որ տվյալ հացի գինը գրեթե բոլոր արտադրողների արտադրանքների պարագայում իրականում ավելի բարձր է թերքաշ լինելու, ինչպես նաև նորմայից ավելի ջրի պարունակության պատճառով:

Ինչ վերաբերում է սուրճի, թեյի, հրուշակեղենի գների նվազման վերաբերյալ ՀՀ ազգային վիճակագրական ծառայության նախագահի խորհրդականի ասածին, ապա այդ ապրանքների գների նվազում նույնպես չեմ նկատել բոլոր այն խանութներում, որտեղից գնումներ եմ կատարում: Պարոն Մարտիրոսյանը գուցե ասի, թե ո՞ր խանութներում են դրանց գների նվազում գրանցել, որպեսզի այսուհետ օգտվենք այդ խանութներից:

Արթուր Հովհաննիսյան