«Սաս Գրուպ» ՍՊԸ-ի պատասխանատու անձի նկատմամբ կնշանակվի վարչական տույժ. բա որ գումարի չափն էլ իմանաք…

Ս. թ. օգոստոսի 2-ին ՀՀ գյուղատնտեսության նախարարության սննդամթերքի անվտանգության պետական ծառայությունը (ՍԱՊԾ) տեղեկացրեց «Սաս Գրուպ» ՍՊԸ-ում հայտնաբերված մեծաթիվ ու բավական լուրջ խախտումների մասին: Ծառայությունը ստուգումներ է իրականացրել «Սաս Գրուպ» ՍՊԸ-ին պատկանող սուպերմարկետի արտադրամասում և իրացման ցանցում, ստուգումների շրջանակներում իրականցված լաբորատոր փորձաքննությամբ պարզվել է, որ մի շարք արտադրատեսակներ ուղղակի վտանգավոր են:

Ստուգումների շրջանակներում իրականցված լաբորատոր փորձաքննությամբ մասնավորապես, ըստ պաշտոնական տեղեկատվության, պարզվել է, որ 21.07.2016թ. արտադրության «Կեսար» աղցանը՝ ՄԱՖԱՄ, ԱՑԽՄ, E. coli, պրոտեուս դասի մանրէների, խմորասնկերի և բորբոսասնկերի, 21.07.2016թ. արտադրության «Մայրաքաղաքային» աղցանը՝ ՄԱՖԱՄ, ԱՑԽՄ, E. coli, պրոտեուս դասի մանրէների, խմորասնկերի, բորբոսասնկերի, 21.07.2016թ. արտադրության «Սմբուկով» աղցանը՝ ՄԱՖԱՄ, ԱՑԽՄ, բորբոսասնկերի, 22.07.2016թ. արտադրության «Բրնձով-կրաբով» աղցանը՝ ՄԱՖԱՄ, ԱՑԽՄ, E. coli, խմորասնկերի, 22.07.2016թ. արտադրության «Հավով-ընկույզով» աղցանը՝ ՄԱՖԱՄ, ԱՑԽՄ, E. coli, 22.07.2016թ. արտադրության «Ծովախեցգետնով» աղցանը՝ ՄԱՖԱՄ, ԱՑԽՄ, E. coli, պրոտեուս դասի մանրէների, խմորասնկերի, 20.07.2016թ. արտադրության չանախ «Կալինինո» պանիրը՝ ոսկեգույն ստաֆիլակոկ և ԱՑԽՄ ցուցանիշների անթույլատրելի քանակի պարունակությամբ չեն համապատասխանել Մաքսային Միության ՏԿ 021/2011-ով, 033/2013-ով և 034/2013-ով սահմանված պահանջներին, ինչով պայմանավորված էլ այդ արտադրատեսակները ճանաչվել են վտանգավոր:

Ծառայության կողմից արգելվել է վտանգավոր ճանաչված խմբաքանակների վաճառքն իրացման ցանցում: Տնտեսավարողին հանձնարարվել է նշված սննդամթերքը ոչնչացնել կամ օգտահանել սահմանված կարգով և ժամկետներում: Ծառայության պետ Արմեն Հայրապետյանի օգոստոսի 2-ի որոշմամբ կասեցվել է «Սաս Գրուպ» ՍՊԸ-ի կողմից արտադրվող «Կեսար», «Մայրաքաղաքային», «Սմբուկով», «Բրնձով-կրաբով», «Հավով-ընկույզով» և «Ծովախեցգետնով» աղցանների արտադրությունը՝ մինչև հայտնաբերված խախտումների վերացումը: Ի դեպ, խախտումների վերացման ժամկետ է սահմանվել մինչև 2016 թվականի օգոստոսի 15-ը, այսինքն՝ երեկ այդ ժամկետն արդեն լրացել է:

Մեզ կամ սպառողներին դեռ հայտնի չէ, թե ՍԱՊԾ-ն հիշյալ արգելքից հետո արդյոք հետևե՞լ է, թե հիշյալ սննդամթերքների վտանգավոր ճանաչված խմբաքանակների վաճառքն իրացման ցանցում դադարեցվե՞լ է, թե ոչ, տնտեսվարողը կատարե՞լ է նշված սննդամթերքները սահմանված կարգով և ժամկետներում ոչնչացնելու կամ օգտահանելու իրեն տրված հանձնարարությունը, նշված աղցանների արտադրությունն իսկապե՞ս կասեցրել է մինչև հայտնաբերված խախտումների վերացումը…

Ծառայությունը հայտնաբերել է նաև մակնշման խախտումներ, մասնավորապես՝ խմորեղենի, աղցանների, կիսապատրաստուկների և կշռածրարված սննդամթերքի մակնշումը թերի է եղել, ինչն արդեն իսկ շտկվել է ստուգումների շրջանակում:

Այն, ինչ ՍԱՊԾ-ն հայտնաբերել է «Սաս Գրուպ» ՍՊԸ-ին պատկանող սուպերմարկետի արտադրամասում և իրացման ցանցում, իսկապես վտանգավոր ու խայտառակ բնույթի խախտումներ են: Հայտնաբերված խախտումների տարատեսակությունն ու զանգվածային բնույթը վկայում են դրանց ոչ թե պատահական, դիպվածային, այլ օրինաչափ լինելը: Իր երկրի բնակչության առողջության մասին մտածող, հոգացող, նրան վտանգավոր սննդամթերքի սպառումից պաշտպանող ցանկացած քաղաքակիրթ երկրում այսպիսի խախտումների հայտնաբերման դեպքում թերևս կփակեին ընկերության արտադրամասն էլ, իրացման ցանցի խանութներն էլ: Հայաստանը, ցավոք, այդպիսի երկրների շարքում չէ, այստեղ իշխանություններն իրենց հնարած օրենսդրությամբ հիմնականում ոչ թե բնակչության առողջությունն ու շահերն են պաշտպանում, այլ մեծ ու փոքր օլիգարխների, «ախպեր տղերքի» բիզնեսը, և նաև այդ պատճառով է, որ ունենք այս խայտառակ ու վտանգավոր իրավիճակը:

Ի պատասխան Լուրեր.com-ում օգոստոսի 11-ին հրապարակված «Երբ վտանգվել է մեր առողջությունը, ի՞նչ պատասխանատվության են ենթարկվել «Սաս Գրուպ»-ը, «Ալֆա-Ֆարմ»-ը և «Աշոտ Գյունաշյան» Ա/Ձ-ն» վերտառությամբ հոդվածում (http://lurer.com/?p=230821&l=am ) հոդվածում առկա հարցի՝ «Առ այսօր «Սաս Գրուպ» ՍՊԸ-ն հիշյալ խախտումների համար վարչական տուգանքի ենթարկվե՞լ է, ե՞րբ և քանի դրամ է տուգանվել, եթե ոչ, ինչո՞ւ…», Սննդամթերքի անվտանգության պետական ծառայությունն այսօր տեղեկացրեց հետևյալը.

«Հայաստանի Հանրապետությունում ստուգումների կազմակերպման և անցկացման մասին» ՀՀ օրենքով սահմանված կարգով՝ ստուգման արդյունքներն ամփոփվում են ստուգման ժամկետի ավարտից հետո՝ 10 աշխատանքային օրվա ընթացքում, որից հետո նույն օրենքով սահմանված կարգով և ժակետներում, եթե խախտումներ չեն հայտնաբերվել՝ կազմվում է տեղեկանք, իսկ, եթե հայտնաբերվել են՝ կազմվում է ստուգման ակտի նախագիծ, որն ուղարկվում է տնտեսավարող սուբյեկտին. տնտեսավարողն իրավունք ունի հինգ աշխատանքային օրվա ընթացքում ներկայացնել առարկություն: Այնուհետև՝ երեք աշխատանքային օրվա ընթացքում կազմվում է ստուգման ակտ և վարչական իրավախախտումների վերաբերյալ արձանագրություն, որոնց մեկ օրինակն ուղարկվում է տնտեսավարող սուբյեկտին և դրանից հետա առնվազն 15 օր հետո նշանակվում է վարչական իրավախախտման վերաբերյալ գործի քննություն, որի արդյունքներով որոշվում է պատասխանատու անձին վարչական պատասխանատվության ենթարկելու հարցը»:

ՍԱՊԾ-ից ստացված պատասխանում նշված է նաև, որ ՀՀ օրենսդրությամբ նախատեսված հիշյալ գործընթացների ավարտից հետո կնշանակվի վարչական տույժ: Տողերիս հեղինակի բանավոր հարցմանը' վարչական տույժի գումարի չափի վերաբերյալ, ծառայությունից տվեցին հետևյալ պատասխանը՝ 50-300 հազար դրամի չափով, սակայն այժմ դեռ դժվարացան ասել, թե նշված խախտումների համար պատասխանատու անձին քանի դրամով են տուգանելու, դա պարզ կդառնա, երբ որոշվի պատասխանատու անձին վարչական պատասխանատվության ենթարկելու հարցը:

Հիմա, կարծում եմ, արդեն հասկանալի է, թե Հայաստանում ինչո՞ւ նմանաբնույթ խախտումների պակաս չկա: Ախր 50 հազար դրամը «Սաս Գրուպ»-ի տիրոջ երևի մեկ ընդմիջման գումարն է, 300 000 դրամն էլ՝ ընկերների հետ ռեստորանում մեկ երեկույթ անցկացնելու: Վաղուց հասունացած է հիշյալ տուգանքի առավելագույն չափը բարձրացնելու խնդիրը: Թե ՍԱՊԾ-ն այս կապակցությամբ առ այսօր ե՞րբ և ի՞նչ առաջարկ է ներկայացրել ՀՀ գյուղատնտեսության նախարարություն, որպեսզի վերջինս էլ այն կառավարություն ներկայացնի, կամ ընդհանրապես ներկայացրե՞լ է, թե ոչ, եթե մատը մատին չի տվել, ապա ո՞րն է դրա պատճառը, հիշյալ նախարարությունն, իր հերթին, ինչ է արել, կպարզենք և ընթերցողներին կներկայացնենք առաջիկայում: Առանձնապես չեմ զարմանա, եթե պարզվի, որ «Սաս Գրուպ» ՍՊԸ-ին պատկանող սուպերմարկետի արտադրամասում և իրացման ցանցում հիշյալ խախտումները հայտնաբերելու և ստուգման գործընթացն իր տրամաբանական ավարտին հասցնելու համար ՍԱՊԾ-ն պետբյուջեի գումարներից ստիպված է եղել ծախսել ու ծախսելու է տուգանքի առավելագույն չափից՝ 300 000 դրամից շատ ավելի մեծ գումար:

«Երբ վտանգվել է մեր առողջությունը, ի՞նչ պատասխանատվության են ենթարկվել «Սաս Գրուպ»-ը, «Ալֆա-Ֆարմ»-ը և «Աշոտ Գյունաշյան» Ա/Ձ-ն» հոդվածում Սննդամթերքի անվտանգության պետական ծառայության պետ Արմեն Հայրապետյանին ուղղել էի նաև այլ հարցեր, որոնք կապված չեն «Սաս Գրուպ» ՍՊԸ-ի հետ: Ստացվել են նաև այդ հարցերի պատասխանները, դրանք կներկայացվեն առաջիկա հրապարակումներից մեկով:

Արթուր Հովհաննիսյան