Վրաստանում ծովափնյա հանգստատների ուղեգրերի արժեքը բարձրացել է, բայց նույնիսկ բարձրացված արժեքով այնտեղ հանգստանալը մնում է նախընտրելի

Այս օգոստոսին կտրուկ բարձրացել են Վրաստանի ծովափնյա հանգստատների ուղեգրերի գները: Հայտարարությունների տարբեր կայքերում, համացանցում հրապարակված հայտարարություններում նշված գները հիմնականում չեն համապատասխանում իրականությանը:

Երբ զանգահարում ես կամ գնում զբոսաշրջային բիզնեսով զբաղվողների գրասենյակներ, պարզվում է բոլորովին այլ իրականություն:

Նայում եմ հայտարարությունների ամսաթվերին, հրապարակվել են երեկ կամ այսօր, հարցնում եմ' բայց չէ՞ որ շատ ժամանակ չի անցել, նոր եք հրապարակել այս հայտարարությունները, ինչո՞ւ եք հիմա այլ գումար պահանջում: Այստեղի պատասխանատուները, աշխատակիցները պարզաբանում են, որ գնային տարբերությունների համար իրենք մեղավոր չեն, «վրացիները նույնիսկ ժամ ժամի վրա գին են բարձրացնում»: Թե իրականությունը ո՞րն է, դժվար է ասել, բայց ստացածդ տհաճ տպավորությունն այդ բացատրությունից չի վերանում:

Հայաստանում առկա առաջարկների ուսումնասիրությամբ պարզեցի, որ Քոբուլեթիում, եթե ցանկանում եք, որ հյուրանոցն առաջին գծում լինի, այսինքն' մոտ լինի ծովին, ասենք, ծովից մոտ 50 մետր հեռու լինի, ծովին նայող պատուհան ունենա, հյուրանոցի սենյակում լինեն սանհանգույց, սառնարան, հեռուստացույց (կաբելային ալիքներով), օդորակիչ, անվճար ինտերնետ Wi-Fi կապով, ապա 7 օրվա համար մեկ անձի ուղեգրի արժեքն այս օրերին 100-105 հազար դրամ է:

Փաթեթն իր մեջ ներառում է օրական մեկանգամյա սնունդ (նախաճաշ) և երկկողմանի ուղևորափոխադրում: Պարզ հաշվարկը վկայում է, որ մեկ օրվա արժեքը ստացվում է 15 000 դրամ:

Ճիշտ է, երկար որոնումներից հետո հաջողվեց գտնել մի ընկերություն (չգովազդելու նպատակով անվանումը չեմ նշում), որը Քոբուլեթիի Աղմաշենեբելի փողոցում գտնվող հյուրանոցներից մեկում նույն տևողության ու ճիշտ նույն պայմաններով (բացառությամբ սննդի) հանգստի համար ուղեգրերն այժմ իրացնում է 115 000 դրամով, սակայն մեկանգամյա սննդի (նախաճաշի) փոխարեն առաջարկում է օրական 2-անգամյա սնունդ (շվեդական սեղան), սակայն այսօր այսպիսի առաջարկներ գտնելը դժվար է:

Սա միանշանակ նախընտրելի է մեզ հայտնի մյուսների առաջարկներից, թեև այս դեպքում մեկ օրվա հանգստի արժեքը ստացվում է վերը նշվածից քիչ ավելի' 16-17 հազար դրամ, ընդ որում, հյուրանոցում գործում են վերելակ, ավտոկայանատեղի, մանկական խաղահրապարակ, մանկական լողավազան, ռեստորան, սրճարան, բիլիարդ (վճարովի):

Կարելի է ենթադրել, որ Քոբուլեթիում, ինչպես նաև Վրաստանի ծովափնյա այլ հանգստավայրերում ուղեգրերի գների բարձրացումը բացի սեզոնային գործոնով պայմանավորված լինելուց, հետևանքն է դեպի Թուրքիա ռուսաստանցի զբոսաշրջիկների հոսքի կրճատման ու նրանց մի մասի' Վրաստանի սևծովյան հանգստավայրեր ուղևորվելու: Եթե դա չէ պատճառը, ապա ուղեգրերի գներն ավելի մեծ շահույթ ստանալու համար մերոնք կամ վրացիները (գուցե երկուսն էլ միաժամանակ) բարձրացնում են պարզապես առիթից օգտվելով, քանի որ, միևնույն է, պահանջարկը կա: Որքան էլ ցավալի է, նույնիսկ այս պայմաններով հանգիստը Քոբուլեթիում ավելի նախընտրելի է, քան Սևանա լճի ափին հանգստանալը, որտեղ հանգստատների, տնակների ու ծառայությունների համար շարունակում են դրանց պայմաններին և որակին անհամարժեք գումարներ պահանջել: Մերոնք այդպես էլ խելքի չեկան:

Արթուր Հովհաննիսյան