Չեն իմացել, որ զենքերը, ռազմամթերքն ու պայթուցիկ նյութերը նախատեսվում են Հայաստանում իշխանության զավթման ժամանակ գործածելու համար

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում (նախագահող դատավոր' Արմեն Բեկթաշյան) այսօր ժամը 17:00-ին նշանակված, նախատեսված է անցյալ տարվա նոյեմբերի 25-ին Երևանում, Նորք Մարաշ վարչական շրջանի 9-րդ փողոցի սեփական տներից մեկում վնասազերծված զինված հանցավոր խմբի անդամներից չորսին վերաբերող քրեական գործով դատավարությունը:

Այս քրեական գործը' որպես մաս, անջատվել է «մայր» քրեական գործից և առաջինն է ներկայացվել դատարանի քննությանը, քանի որ նրանց համեմատաբար մեղմ մեղադրանքներ են առաջադրված: Ըստ մեղադրական եզրակացության, նրանց արարքներում կա չիմացության հանգամանքը, չեն իմացել, որ զենքերը, ռազմամթերքն ու պայթուցիկ նյութերը նախատեսվում են Հայաստանում իշխանության զավթման ժամանակ, ըստ անհրաժեշտության, գործածելու համար: Դատելով ամենից՝ բոլոր չորսն էլ Գյումրիի բնակիչներ են: Հիշենք, որ հանցախմբի վնասազերծումից հետո ԱԱԾ մամուլի ծառայության պաշտոնական հաղորդագրության համաձայն, 1981թ. ծնված, 1997 թվականից Իսպանիայում բնակվող և 2015թ. ապրիլից Երևանում ժամանակավոր բնակություն հաստատած ՀՀ քաղաքացի Արթուր Վալերիկի Վարդանյանի կողմից ՀՀ-ում ծանր և առանձնապես ծանր հանցագործություններ կատարելու նպատակով 2015-ի ընթացքում ստեղծված ու ղեկավարված հանցավոր գործակցության կազմում հավաքագրված ՀՀ քաղաքացիներից 7-ը Շիրակի մարզի բնակիչներ են:

Քրեական գործի նախաքննությամբ պարզվել է, որ Հակոբ Հակոբյանն Արթուր Վարդանյանից 2015թ. հուլիսին առաջարկություն ստանալով համապատասխան վարձատրության դիմաց զենք, ռազմամթերք ու պայթուցիկ նյութեր հայթայթել և իրեն իրացնել, չիմանալով հանդերձ, որ դրանք նախատեսվում են Հայաստանում իշխանության զավթման ժամանակ, ըստ անհրաժեշտության, գործածելու համար, նույն հարցով դիմել է իր ծանոթին' Գյումրիի բնակիչ Անուշավան Ավետիսյանին, որից հետո երկուսով, նախնական համաձայնությամբ, ձեռնամուխ են եղել այդ գործընթացին:

Նույն քր. գործով մեղադրանք է առաջադրվել նաև Անուշավան Ավետիսյանին այն բանի համար, որ նա Հակոբ Հակոբյանից 2015թ. հուլիսին առաջարկություն ստանալով համապատասխան վարձատրության դիմաց զենք, ռազմամթերք և պայթուցիկ նյութեր հայթայթել և իրացնել Արթուր Վարդանյանին, չիմանալով հանդերձ, որ դրանք նախատեսվում են Հայաստանում իշխանության զավթման ժամանակ, ըստ անհրաժեշտության, գործածելու համար, երկուսով, Հակոբ Հակոբյանի հետ նախնական համաձայնությամբ, ձեռնամուխ են եղել այդ գործընթացին:

Տվյալ քր. գործով մյուս մեղադրյալը Հարություն Հովհաննիսյանն է: Համաձայն քր. գործի նյութերի, նա Անուշավան Ավետիսյանից 2015թ. հուլիսին առաջարկություն ստանալով համապատասխան վարձատրության դիմաց զենք, ռազմամթերք և պայթուցիկ նյութեր հայթհայթել և իրացնել, չիմանալով հանդերձ, որ դրանք նախատեսվում են Հայաստանում իշխանության զավթման ժամանակ, ըստ անհրաժեշտության, գործածելու համար, Գյումրիում նրան 900 ԱՄՆ դոլարով իրացրել է…

Մեղադրանք է առաջադրվել նաև Ստեփան Չիլինգարյանին այն բանի համար, որ նա Անուշավան Ավետիսյանից 2015թ. հուլիսին առաջարկություն ստանալով համապատասխան վարձատրության դիմաց զենք, զինամթերք և պայթուցիկ նյութեր հայթհայթել և իրացնել, չիմանալով հանդերձ, որ դրանք նախատեսվում են Հայաստանում իշխանության զավթման ժամանակ, ըստ անհրաժեշտության, գործածելու համար, Գյումրիում նրան 4700 ԱՄՆ դոլարով իրացրել է իր կողմից ձեռք բերվածը:

Դատաքննության ընթացքում կհրապարակվի, թե խոսքը մասնավորապես ինչ զենք, զինամթերք և (կամ) պայթուցիկ նյութերի մասին է: Հիշենք, որ ըստ ԱԱԾ 25.11.2015թ. պաշտոնական հաղորդագրության, Արթուր Վարդանյանի կողմից վարձակալած նշված սեփական տան խուզարկության արդյունքում հայտնաբերվել են 6 հատ «ԱԿ-74» տեսակի ինքնաձիգ, 4 հատ ԱԿՄ տեսակի ինքնաձիգ, որից մեկը' խլացուցիչով, 1 հատ ՏՏ տեսակի ատրճանակ, 1-ական ողորկափող և օդամղիչ հրացաններ, տարբեր տրամաչափի ընդհանուրը 5261 փամփուշտ, 2 հատ ինքնաշեն պայթուցիկ սարք (խուզարկության պահին եղել են միացված, վնասազերծվել են), 1 հատ պայթեցման սարք, 1 հատ հակատանկային բեկորային ական «ՄՈՒՎ 50», մոտ 1200 գրամ «տրոտիլ» պայթուցիկ նյութ, մոտ 50 գրամ «պլաստիդ» պայթուցիկ նյութ,11 հատ «Ֆ1» նռնակ, 46 հատ ՌԳ նռնակներ, 3 հատ «ՌԳԴ-5» նռնակ, 2 հատ հակատանկային նռնականետ, 20 հատ ինքնաձիգի պահունակ, պայթուցիչներ, օպտիկական նշանացույցեր, հեռադիտակներ, դետոնատորներ, մեծ քանակության զինվորական համազգեստ և հանդերձանք: Հարություն Հովհաննիսյանի և Ստեփան Չիլինգարյանի ձեռք բերածն ու իրացրածը սրա սոսկ մի մասն է:

Վերը նշված արարքների համար Հակոբ Հակոբյանին և Անուշավան Ավետիսյանին մեղադրանք է առաջադրվել ՀՀ քրեական օրենսգրքի 235-րդ հոդվածի («Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը») 2-րդ, իսկ Հարություն Հովհաննիսյանի և Ստեփան Չիլինգարյանին' նույն հոդվածի 1-ին մասով, բոլոր չորսի նկատմամբ ընտրված խափանման միջոցը կալանքն է: