Դեռ շա՜տ շուտ է CNN-ի և Google-ի մասին խոսելը...

ՀՀ Սփյուռքի նախարար Հրանուշ Հակոբյանը հայ գիտնականներին խորհուրդ է տալիս, որպեսզի համախմբվեն ու ստեղծեն համահայկական և ազգօգուտ CNN, Google ինտերնետային ցանց: Հրանուշ Հակոբյանը երևի չի մտածել, որ գիտնականներից ինչ-որ բան խնդրելուց առաջ նախ պետք է օգնել այդ գիտնականներին, հետո նոր խորհուրդներ տալ:

Սակայն ինչ CNN-ի կամ Google մասին է խոսքը գնում, երբ ինտերնետային տիրույթում Արցախի հանրապետությունը նշվում է, որպես Ադրբեջանի հանրապետության մաս: Այսքան ժամանակ դեռ չենք կարողացել այդ հարցը լուծել:

Համացանցը ևս քարոզի ձև է, որից պետք է ճիշտ օգտվել, որպեսզի աշխարհին հասկանալի լինի ասելիքդ: Իսկ այդ պայքարում մենք դեռ զիջողի դերում ենք, քանի որ ամենահասարակ հարցերը չենք կարողացել լուծել, քանի որ ցանկացած արտասահմանցի, եթե Արցախը համացանցով տեսնում է, որպես Ադրբեջանի մաս, ապա մենք դեռ շատ անելիք ունենք այդ բացերը լռեցնելու համար:

Էլ չասեմ, որ շա՜տ շուտ է CNN-ի և Google-ի մասին խոսելը...

Շարունակենք։

Ըստ Հրանուշ Հակոբյանի՝ ինտերնետային տիրույթը հնարավորություն է տվել, որպեսզի հայրենիքի ու սփյուռքի միչև եղած կապը ավելի հեշտանա ու արագանա: Սփյուռքահայերին անհրաժեշտ բոլոր տեսակի հայ գրականությունները տեղադրվում են համապատասխան էլեկտրոնային գրադարաններում, որտեղից էլ օգտվում են սփյուռքահայերը: Ինտերնետը հնարավորություն է տվել նաև ստեղծել շտեմարան և ամենագլխավորը, համացանցի հնարավորություններն օգտագործելով՝ զարգացել է հայագիտությունը, ստեղծվել են ուսուցողական կայքեր և հայոց լեզվի ուսուցման ծրագրեր...

Այս ամենը գնահատելու ու հետագայում ավելի լավ արդյունքների հասնելու համար, ոչ միայն Հրանուշ Հակոբյանը, այլ նաև ոլորտի պատասխանատուները ու այլ պաշտոնյաներ պետք է ուշադրություն դարձնեն տեղեկատվական պայքարին: Տեղեկատվական պայքարը ոչնչով չի զիջում այլ պայքարներին, այստեղ էլ ցանկացած սխալ քայլի դեպքում լուրջ խնդիրների առաջ ես կանգնում, ցանկացած խնդրից հետո այստեղ էլ կա պարտություն և հաղթանակ:

Այնպես որ, մինչև CNN և Google ստեղծելը, նախ պետք է եղածին ուշադրություն դարձնենք ու զարգացնենք:

Անի Սահակյան