Պարոն նախարար, ովքե՞ր են ձեր տեսուչները…

Ծանոթանալով այս քրեական գործին, դժվար է ՀՀ բնապահպանության նախարար Արամ Գրիգորյանին չհարցնել` պարոն նախարար, ովքե՞ր են ձեր տեսուչները, այս ո՞ւմ եք տեսուչ նշանակել կամ ո՞ւմ են տեսուչ նշանակել ձեզ մոտ, ի վերջո, ո՞ւմ եք վստահել անտառի պահպանությունը: Լավ, բայց չէ՞ որ սա անտառապահի, անտառի պահապանի, պաշտպանի, տեսուչի կողմից` պաշտոնապես արձանագրված այսօրինակ առաջին դեպքը չէ, մինչև ե՞րբ… Ախր ապօրինի հատումների հետևանքով մեր անտառները գնալով նվազում ենք, մենք, եթե, իհարկե, չգիտեք, կորցնում ենք մեր անտառները:

Քրեական գործի նախաքննությամբ պարզվել է, որ Մարինե Պետրոսյանը մեղադրանք հանդիսանալով ՀՀ բնապահպանության նախարարության «Դիլիջան Ազգային պարկ» ՊՈԱԿ-ի «Հաղարծին» տեղամասի 7-րդ պահաբաժնի տեսուչ, ստացել է վարչատնտեսական գործառույթներ իրականացնող պաշտոնատար անձի կարգավիճակ: Ըստ մեղադրական եզրակացության, Մ. Պետրոսյանը կրելով նյութական պատասխանատվություն իրեն ամրակցված նյութական արժեքների համար, դրսևորել է անգործություն՝ իր վրա դրված պարտականությունները պատշաճ չի կատարել, ինչի հետևանքով նրա պահպանության տակ գտնվող պահաբաժնից քննությամբ ինքնությունը չպարզված անձանց կողմից ապօրինի հատվել են առանձնապես խոշոր չափերի հասնող, 3 340 000 դրամ սակագնային արժեքով 162 հատ տարբեր տեսակի թաց կանգուն ծառեր, պետությանը պատճառելով 16 745 000 դրամի վնաս: Հեշտ է ասելը` 162 հատ ծառ…

Վերը նշված արարքի համար Մարինե Պետրոսյանին մեղադրանք է առաջադրվել ՀՀ քրեական օրենսգրքի 315-րդ հոդվածի («Պաշտոնեական անփութությունը») 2-րդ մասի հատկանիշով: