«Գեներալ Մանվելը որ չլիներ չէ՞, Զարզանդին սկի կնիկ չէին տա»

Արցախյան պատերազմի մասնակիցներին զայրացրել է Արշալույսի գյուղապետ Զարզանդ Գրիգորյանի հայտարարությունը, թե իբր ինքը մասնակցել է Արցախյան պատերազմին, իսկ պտուղները Մանվել Գրիգորյանն է վայելում։ Ստորեւ ներկայացվում է երկրապահներից մի քանիսի գնահատականն ասվածին։

Անան Ոսկանյան՝ ԵԿՄ Արթիկի տարածքային բաժանմունքի նախագահ.
- Զորավար Մանվել Գրիգորյանն է Զնդոյին ու դրա ուրացող եղբայրներին մարդ դարձրել։ Հիմա սրանք էլ որոշել են իրենց գլխից բարձր թռչել։ Չեն էլ հասկանում, որ այն օրից, երբ իրենց ազգն, իրենց արյունն ուրացան, դարձան զերո, դարձան ոչնչություն։ Իրենց նման ոչնչությունների հետ էլ միավորվել են՝ Թումանյան Արթուր, Հրաչիկ, Ճոյտ, չգիտեմ ինչ։ Չեն էլ հասկանում, որ զերոների գումարը զերո է։

Յուրա Ալեքսանյան՝ ԵԿՄ Շիրակի մարզային խորհրդի նախագահ.
- Եթե ամեն մի լակոտ, որ դեռ քիթ սրբել չգիտե, իրեն թույլ տա հողահավաք զորավարի հասցեին վայրահաչել, մեր ազգի վիճակը լավ չի լինի։ Զնդոն որոշել է թուրքերին ծառայություն մատուցել, բայց թող զգույշ մնա, Արցախյան պատերազմի մասնակիցներս կարող ենք իրեն չներել։

Յուրա Օհանյան՝ ԵԿՄ Մասիսի տարածքային բաժանմունքի նախագահ.
- Ամոթ է, էլի, Զարզանդը գոնե ջոկ ղեկավարե՞լ է, որ հիմա մեծ-մեծ խոսում է։ Եթե Զորավար Մանվել Գրիգորյանը չի մասնակցել արցախյան պատերազմին, դա նշանակում է, որ այդ պատերազմը չի եղել։ Հենց Զորավարն է եղել արցախյան պատերազմում ամենաշատ տարածքներ ազատագրողն ու պաշտպանողը։ Դա կհաստատի ամեն ոք, ով ինչ-որ առնչություն է ունեցել Արցախյան ազատամարտին։

Աբել Հարությունյան՝ ԵԿՄ կոտայքի մարզային խորհրդի նախագահ.
- Այ Զարզանդ, մոռացա՞ր՝ ո՞վ ես եղել պատերազմում։ Գեներալը չլիներ, հիմա քո չարաճճիությունների պատճառով ընկել՝ մեռել էիր։ Կամ մոռացե՞լ ես, որ երբ Մանվել Գրիգորյանին ռուսական օմոնը գերի վերցրեց, դու թողիր-փախար ռազմի դաշտից։ Բերանդ փակի, թե չէ ինձ նման տղերքը քեզ կլռեցնեն։

Աշոտ Խաչատրյան՝ ԵԿՄ Արմավիրի մարզային խորհրդի նախագահ.
- Գեներալ Մանվելը որ չլիներ չէ՞, Զարզանդին սկի կնիկ չէին տա։ Գեներալն է միջնորդել, որ Ջերմուկի Համոն դստերը կնության տա Զնդոյին։ Ապերախտություն է, հարամություն է գեներալի հասցեին չարախոսելը։ Զարզանդն ինքն է թալանչի, սաղ Արշալույսը թալանել, կերել է, հիմա ազգի հերոս մարդու վրա շառեր է անում։ Ամոթ ա Զնդո, խելքի արի։