Լավրովի պլանի վախճանը

Երեկ, ՀՀ պաշտպանության նախարար Սեյրան Օհանյանն ասել է. «Եթե չկա վստահության մթնոլորտ, մենք չենք կարող խոսել փոխադարձ համաձայնությունների մասին»: Խոսքը, բնականաբար, ԼՂ խնդրի կարգավորման գործընթացի մասին է: Դեռ օրեր առաջ Հայաստանի իշխանությունը հստակ հասկացրեց, որ որևէ ակնկալիք չունի սեպտեմբերի 8-ին Մոսկվայում պլանավորված Սերգեյ Լավրով-ԵԱՀԿ Մինսկի խմբի համանախագահություն հանդիպումից:

«Ի՞նչ ակնկալիքներ, երբ նույն պրոցեսի մեջ ենք քսան տարուց ավելի: Ակնկալիք կարող է լինել այն դեպքում, երբ Ադրբեջանը փոխի իր դեստրուկտիվ մոտեցումը»,- սեպտեմբերի 6-ին ասել էր ԱԳ փոխնախարար Շավարշ Քոչարյանը: Սա պաշտոնական Երևանի հստակ բացասական վերաբերմունքն է կարգավորման ռուսական կամ լավրովյան պլանին:

Ի դեպ, հիմքեր կան ենթադրելու, որ այդ պլանն այլևս դուրս է եկել շրջանառությունից և կարգավորման գործընթացը դարձյալ հայտնվել է փակուղում: Նախ, չնայած խոսակցություններին, այդպես էլ չի հստակեցվում Սերժ Սարգսյան- Իլհամ Ալիև հերթական հանդիպման օրը: Մյուս կողմից` Լավրովի և եվրանախագահության հանդիպման մասին տրվեց բացառապես պաշտոնական, լակոնիկ տեղեկատվություն, առանց փորձագիտական և տեղեկատվական արտահոսքերի: Ակնհայտ է, որ սեպտեմբերի 8-ին Մոսկվայում չի քննարկվել կարգավորման բովանդակությանը վերաբերվող որևէ հարց: Ռուսական կողմն, ըստ երևույթին, այս հանդիպումով ցանկացել է ցույց տալ իր առաջատարությունը կարգավորման գործընթացում: Մյուս կողմից, եթե մոսկովյան հանդիպմանը չի հաջորդել գործընթացի նոր «ճանապարհային քարտեզի» մասին որևէ տեղեկավություն` անուղղակի հաստատվում է ռուսական պլանի վախճանի մասին վարկածը:

Սարգիս Հակոբյան