Լավ էլ հարուստ վարչապետ ունենք՝ ազդեցիկ գործընկերներով ու խնամիներով

Ասում են՝ մեր նոր վարչապետը համեստ մարդ է: Գուցե դա այդպես է, սակայն համեստությունը չի խանգարել, որ Կարեն Կարապետյանը ահռելի հարստություն կուտակի: Նա առանձնապես չի տարբերվել մեր պաշտոնյաներից և օլիգարխներից ու ընտանիքի բիզնեսը գրանցել է որդու՝ Տիգրան Կարապետյանի անունով: Երբ ուշադիր հետևում ենք Hetq.am-ի ուսումնասիրություններին՝ պարզում ենք, որ Տիգրանն ահռելի «բիզնեսկայսրության» տեր է: Օրինակ՝ նա 50% բաժնետեր է «Էդ ընդ թի փարթներս» ՍՊԸ-ում, որին պատկանում է կանանց ներքնազգեստի էլիտար խանութ սրահը: «Դալմա ինվեստ» և «Էրեբունի պլազա» ՍՊԸ-ներում Կարապետյանը նույնպես բաժնետեր է, իհարկե սահմանափակ ներկայությամբ: Հրազդանի կիրճում գտնվող «Ֆլորենս» ռեստորանը ու «Բի Բի մեդիա» գովազդային գործակալությունը նույնպես պատկանում են Կարապետյանների ընտանիքին: Այս ընտանիքի ակտիվում է նաև գազի սպասարկում իրականացնող «Էյ-ի-ջի սերվիս» ՍՊԸ-ն, վարսավիրանոցների և գեղեցկության սրահների «Սփար բերիի» ՍՊԸ-ն:

Կարապետյանների ընտանիքն ունի նաև ժամացույցների, ոսկերչական արտադրատեսակների, մանրածախ առևտրի մասնագիտացված խանութ:

Սա Կարապետյանների ունեցած ողջ սեփականությունը չէ: Պարզապես խնայում ենք օրվա հացի կարոտ մեր հայրենակիցների համբերությունը:

Կ. Կարապետյանի հիմնական բիզնես-գործընկերը Սամվել Կարապետյանն է՝ իր Տաշիր գրուպով, ում հետ Հայաստանի նոր վարչապետն ընդհանուր բիզնես ունի թե Հայաստանում, թե Ռուսաստանում: Կարելի է ենթադրել, թե Կարապետյանի վարչապետ դառնալու գործում ովքեր են լոբբինգ իրականացրել և ովքեր են շահելու նրա վարչապետությունից:

Եթե սրան գումարենք այն հանգամանքը, որ Տաշիր գրուպի սեփականատիրոջն է պատկանում Հայաստանի էլ. ցանցերը՝ պատկերն ամբողջական է դառնում:

Փաստորեն, Կարապետյանների տանդեմն ունի ամուր հիմքեր Մոսկվայում և Հայաստանում, տիրապետում է տնտեսական լուրջ ռեսուրսների: Այս պարագայում հնարավոր չէ, որ Կարաապետյանի վարչապետությունն ունենա բացառապես մենեջերական բնույթ:

Հարկ եմ համարում տեղեկացնել նաև, որ Կ. Կարապետյանի աղջիկն ամուսանցել է ՍԴ նախագահի եղբոր՝ ԱԱԾ տնօրենի տեղակալ Արզուման Հարությունյանի որդու՝ Հայկի հետ, ով ներկայումս էներգետիկայի փոխնախարարն է:

«Խնամի-ծանոթ-բարեկամ» հանգույցը նույնպես մեր քաղաքական իրականության անբաժանելի ուղեկիցն է:

Եվ վերջապես մի հանգամանքի մասին, որը նույնպես Կ. Կարապետյանին առանձնապես չի տարբերում Հայաստանի էլիտային մյուս ներկայացուցիչներից: Նա նույնպես հոգացել է իր որդու կոմֆորտի մասին: Կ. Կարապետյանի որդին ներկայումս Գազպրոմ Արմենիա ՓԲԸ-ի գլխավոր տնօրենի տեղակալն է, կապիտալ շինարարության և վերանորոգման գծով:

Չար լեզուներն ասում են, որ տարիներ շարունակ հենց այս ոլորտներն են ապահովել Կարապետյանների ընտանիքի բարեկեցությունը:

Այսպիսով, Կ. Կարապետյանն օլիգարխ է: Այլ խնդիր է, որ նա պատկանում է ոչ թե hայկական, այլ ռուսական օլգարխիային:

Արդյոք նրա կարգավիճակը թույլ տալի՞ս է, որ նա իրական պայքար մղի Հայաստանի քրեաօլիգարխիայի դեմ: Արդյո՞ք դրա համար բավարար է միայն այն հանգամանքը, որ նա ինտեգրված չէ հայաստանյան համակարգին: Արդյո՞ք Կ. Կարապետյանը գործող քրեաօլիգարխիային չի հակադրի մեկ այլ, գուցե և ավելի քաղաքակիրթ օլիգարխիկ մոդել: Սրանք հարցեր են, որոնց պատասխանները միայն ժամանակը կարող է տալ:

Սարգիս Հակոբյան