Աշտարակի կամուրջը վերանորոգելու համար գումարը չբավարարեց

«Հյուսիս-հարավ» ճանապարհային միջանցքի՝ նախորդ տարվա դեկտեմբերի 29-ից շահագործման հանձնված Երևան-Աշտարակ շուրջ 11,4 կմ երկարությամբ հատվածը նորից կիսաբաց վիճակում է: Ճանապարհի' Աշտարակի հատվածում նորից սկսվել են շինարարական աշխատանքները: Վերանորոգվում է Աշտարակի կամուրջը, որն, ըստ նախնական ծրագրի, հանդիսանում է ճանապարհի բաղկացուցիչ մասը: Ըստ երևույթին՝ 70,4 միլիոն դոլարը բավարար չէր Աշտարակի կամուրջը վերանորոգելու համար, ուստի նոր ֆինանսական հատկացումներ են արվել վերջինիս վերաներոգման համար:

Նշենք՝ նախորդ տարվա դեկտեմբերին, ըստ պաշտոնական տեղեկատվության, նախագծի համապատասխան ստուգումները ցույց էին տվել, որ ճանապարհը համապատասխանում է միջազգային ստանդարտներին և, ըստ նախագծի, այն ուներ 20-ից 30 տարվա կյանք, սակայն ճանապարհաշինարարներն արդեն հասցրել են հատվածային վերանորոգման աշխատանքներ իրականացնել ճանապարհի տարբեր հատվածներում:

Հիշեցնենք, որ Հյուսիս-հարավ ճանապարհային միջանցքը, հատելով Հայաստանի տարածքը հարավից հյուսիս, ընդգրկելու է Ագարակ-Կապան-Երևան-Գյումրի-Բավրա մայրուղիները և ճանապարհային ենթակառույցները՝ միանալով վրացական ճանապարհի ցանցին, որը տանում է դեպի Փոթի և Բաթումի նավահանգիստներ կամ դեպի արևելք՝ Թբիլիսի: Հյուսիս-հարավ ճանապարհային միջանցքի երկարությունը կազմելու է 556 կմ, կառուցման ժամկետը' 2009-2017 թթ.: Վարկն ապահովում է Ասիական զարգացման բանկը: Վարկի ընդհանուր աժեքը 500 միլիոն դոլար է: Կառավարության կողմից համաֆինանսավորումը պետք է կազմի 462 միլիոն դոլար: