Հայ դիզայներների առաջին ցուցահանդեսը արվեստասերին է ներկայանում բազմաժանր ցուցանմուշներով

Հայ կիրառական արվեստների և դիզայնի միավորման անդամների «Ակունքներից ապագա» խորագրով ցուցահանդեսը բազմաժանր է ու ակնահաճո: «Արմենպրես»-ի փոխանցմամբ՝ հայաստանաբնակ արվեստասերները ունեն մեկ շաբաթ՝ ներկա գտնվելու Հայաստանի նկարիչների միությունում բացված ցուցահանդեսին: Ինչպես լրագրողների հետ զրույցում նշեց Հայ կիրառական արվեստների և դիզայնի միավորման նախագահ, Գեղեցիկ արվեստների ազգային ակադեմիայի հիմնադիր ռեկտոր, պրոֆեսոր Էդուարդ Սեդրակյանը ներկայացված են 34 հեղինակների 200-ից ավելի աշխատանքներ: Նրա խոսքով՝ ցուցադրված են գեղանկարչական, կերամիկական, արծաթագործական, դիզայներական ամենատարբեր ուղղությունների(գրաֆիկական, ինտերիեր, հագուստի, լուսանկարչական դիզայն) աշխատանքներ: «Սա անդրանիկ ցուցահանդեսն է, որին հրավիրված են Էկոնոմիկայի, Մշակույթի, Կրթության և գիտության նախարարություններից: Խորագիրն է «Ակունքներից ապագա», ինչու, որովհետև այն ժողովուրդը, ով չի կարող հենվել իր ակունքների վրա, չի կարող ստեղծել իր ազգային կերպարին համահունչ աշխատանք, չի կարող քայլել առաջ: Համաշխարհային մեծություններ են դարձել նրանք, ովքեր ունեն խիստ ազգային մտածելակերպ ու ստեղծագործել են ազգային հիմքի վրա»,-ասաց Էդուարդ Սեդրակյանը: Նրա տեղեկացմամբ՝ ցուցահանդեսին մասնակցում են թե տղամարդիկ, թե կանայք, ամենատարբեր տարիքի ստեղծագործողներ: Ամենափոքրը 15 տարեկան է, ամենամեծը՝ 72: Սեդրակյանը կարևորեց, որ հայ դիզայներների աշխատանքները լայն կիրառություն ստանան Հայաստանի արդյունաբերությունում՝ ապրանքները շուկայում առավել գրավիչ դարձնելու համար:

15-ամյա Ռաֆայել Խաչատրյանը ցուցահանդեսին ներկայացել է լուսանկարներով, որոնք հիմնականում պատկերում են սրբավայրեր ու խաչքարեր, փորձել է ընտրել ամենահաջողվածները: Պատանին եկեղեցիներ ու սրբավայրեր լուսանկարելն իր հոբբին է համարում՝ նշելով, որ լուսանկարչության հանդեպ հետաքրքրությունն առաջացել է 6 տարեկանում: «Այս լուսանկարներով փորձել եմ վեր հանել մեր հին ժառանգությունը, որոնք նաև բարձիթողի վիճակում են»,-ասաց Ռաֆայել Խաչատրյանը՝ ավելացնելով, որ լուսանկարների իր արխիվում արդեն 2000-ից ավել հաջողված լուսան կարներ ունի: Ցուցահանդեսների է մասնակցել Ռուսաստանի տարբեր քաղաքներում, վերջերս էլ մասնակցել է Արտֆեստ երիտասարդական փառատոնին ու լավագույն լուսանկարչական աշխատանք մրցանակին արժանացել:

Երիտասարդ հեղինակ Աննա Ավալյանի աշխատանքներն են ֆիրմային լոգոտիպերն ու պլակատները: Նրա խոսքով՝ ցուցահանդեսներին մասնակցությունը ոգևորում ու նոր խթան է տալիս ավելի լավ ստեղծագործելու և հետագայում հետաքրքիր աշխատանքներով հանդես գալու: Աննա Ավալյանը տեղեկացրեց, որ տարբեր ընկերությունների կողմից ստանում է լոգոների դիզայն կատարելու պատվերներ:

2013 թվականից Նկարիչների միության գրաֆիկայի սեկցիայի անդամ Դավիթ Հակոբյանը, ով նաև «Արմենպրես» լրատվական գործակալության աշխատակիցն է, ցուցահանդեսին ներկայացել է երեք բնանկարով: «Լոռվա բնություն»-ը քերվածք է(մակերեսն աստիճանաբար քերելով բացում ու ստանում ես նկարը), «Թաղամաս Երևանում»-ը ՝ յուղաներկ է, իսկ «Հաղթանակի կամուրջ» նկարը գուաշով արված աշխատանք է: «Շատ եմ մասնակցել ցուցահանդեսների, այն ստեղծագործողին իրենց աշխատանքի մասին արվեստասերների արձագանքը ստանալու հնարավորություն է տալիս: Արվ եստասերների արձագանքներն օգնում են կողմնորոշվել հետագա անելիքներում, հասկանալ արդյո՞ք չենք ներփակվել մեր սուբյեկտիվության մեջ, որքանով ենք ընդունելի հանրության կողմից»,-ասաց երիտասարդ ստեղծագործողը:

Հագուստի դիզայն ժանրում ստեղծագործող Ինգա Դուդուկչյանը ցուցահանդեսին ներկայցել է երկու հավաքածուներով, որոնք ամենատարբեր ներշնչանքների արդյունք են: «Առաջին հավաքածուն կոչվում է գիծ և ծավալ, այն ամբողջովին հիմնված է կոնստրուկցիայի վրա ու հիշեցնում է քանդակագործություն, որովհետև երբ աշխատում եմ ՝ վերցնում եմ ընդամենը մկրատը և փորձում տալ ծավալներ, ինձ ավելի շատ հետաքրքրում է ծավալային մտածելակերպը: Հագուստի մոդելավորումը դիզայնի մեջ հնարավորություն է տալիս արտահայտել իմ մտքերը, ներքին հույզերը, գույնի, ծավալ ի, գծի հասկացումը, փնտրել նորարարական մոտեցումներ: Երկրորդ հավաքածուն ավարտել եմ այս տարի, այն նիդերլանդական մոտիվներով է: Հենց այդպես էլ վերնագրած է՝ «Հողմաղացների երկրի մոտիվներով»,-ասաց Ինգա Դուդուկչյանը: Նա ավելացրեց, որ հավաքածուն ստեղծել է ճամփորդելու արդյունքում, քանի որ մեծապես տպավորվել էր այդ երկրով: Մեր զրուցակցի խոսքով՝ չնայած Հայաստանում հագուստների համար լայնաֆորմատ տպագրությունը կազմակերպելը բարդ է, բայց նա կարողացել է իր հավաքածուն ամբողջովին ստանալ Հայաստանում:

Անի Նազարյան