Պաշտպանության նախարարությունը հերքում է

Օրեր առաջ ԼՈՒՐԵՐ.com-ը հրապարակել էր «Սկանդալ՝ ՊՆ-ում» վերտառությամբ հոդված, որի վերաբերյալ Քննչական կոմիտեի ռազմական քննչական գլխավոր վարչության՝ հատկապես կարևոր գործերով վարչությունում նյութեր են նախապատրաստվում։ Պաշտպանության նախարարությունը հերքում է ուղարկել ԼՈՒՐԵՐ.com-ի վերոհիշյալ հոդվածի առնչությամբ, որը ներկայացնում ենք ստորև՝ առանց փոփոխության.

«Սեպտեմբերի 23-ին ԼՈՒՐԵՐ.com լրատվական կայքում «Սկանդալ ՊՆ-ում» հոդվածում ներկայացված դեպքերը խեղաթյուրված են և իրականությանը չեն համապատասխանում: Հոդվածը գրելիս լրագրողը խախտել է մասնագիտական էթիկան և միակողմանի տեսակետ հրապարակել՝ առանց ներկայացնելու երկրորդ կողմի՝ ՀՀ պաշտպանության նախարարության դիրքորոշումը կատարվածի առնչությամբ։

Տեղեկացնում ենք, որ պահեստազորի սպա Սահակ Մանուկի Ասատրյանը ս.թ. ապրիլի 27-ին դիմում է ներկայացրել ՀՀ ՊՆ Ներքին աուդիտի վարչություն, ՔՀԾ 2-րդ դասի պետական խորհրդական Ա. Բարսեղյանին ՀՀ ՊՆ ներքին աուդիտի վարչության օպերատիվ աուդիտի բաժնի սպայի պաշտոնին նշանակվելու համար: 02.05.2016թ. ՀՀ ՊՆ ներքին աուդիտի վարչության պետը միջնորդագիր է ներկայացրել ՀՀ ՊՆ կադրերի եւ ռազմական կրթության վարչություն՝ Ս. Ասատրյանին վերոհիշյալ պաշտոնում նշանակելու համար: Բացի վերոգրյալը, ՀՀ ՊՆ ներքին աուդիտի վարչության օպերատիվ աուդիտի բաժնի սպայի պաշտոնի նշանակվելու համար պահանջվող (գաղտնի փաստաթղթերի հետ առնչվելու) թույլտվության 2-րդ ձևը՝ Ս.Ասատրյանին Ազգային անվտանգության ծառայությունից տրվել է 08.06.2016թ. (Բ-241):

Համաձայն սահմանված կարգի, պահեստազորից սպայական պաշտոնի նշանակվելու ցանկություն հայտնած թեկնածուների հետ անցկացվում են ստուգարքներ ֆիզիկական պատրաստությունից (ԶՈւ ֆիզիկական պատրաստության և սպորտի բաժնի սպաների կողմից) և մասնագիտական առարկաներից (վարչություններից ներկայացված հարցաշարերի հիման վրա՝ ՀՀ ՊՆ կադրերի եւ ռազմական կրթության վարչության կողմից): 2016թ. հունիսի 17-ին Ս. Ասատրյանը ֆիզիկական պատրաստության և մասնագիտական առարկաների ստուգարքներից ստացել է «անբավարար» գնահատական: Ընդառաջելով Ս.Ասատրյանի ցանկությանը, բացառության կարգով նրան ևս մեկ անգամ հնարավորություն է տրվել մասնակցելու ստուգարքներին: Օգոստոսի 5-ին անցկացված ստուգարքներից Ս.Ասատրյանը ֆիզիկական պատրաստությունից գնահատվել է «բավարար», իսկ մասնագիտական ստուգարքից կրկին ստացել «անբավարար»: Ինչ վերաբերում է վերոնշյալ հաստիքի կրճատմանը, ապա դա տեղի է ունեցել 26.08.2016թ. ՀՀ պաշտպանության նախարարի Կազմակերպչական հաստիքների հարցերի վերաբերյալ հրամանի հիման վրա:

Կից ներկայացնում ենք նաև պահեստազորի սպա Սահակ Մանուկի Ասատրյանի հանձնած ստուգարքների արդյունքները: