Գյումրիում տեղի ունեցած խուլիգանության գործով կան ձերբակալվածներ

Գյումրիում հոկտեմբերի 14-­ին տեղի ունեցած խուլիգանության գործով կան ձերբակալվածներ: Այս մասին հոկտեմբերի 15­-ին նշեց Գյումրի այցելած ՀՀ գլխավոր դատախազ Արթուր Դավթյանը:

«Անմիջապես հարուցվել է քրեական գործ, այս պահի դրությամբ արդեն ունենք 2 ձերբակալված անձինք, այսօր առիթ կունենամ նաեւ քննության արդյունքներին ծանոթանալու եւ, ըստ անհրաժեշտության, ցուցումներ տալու»,-­ասաց ՀՀ գլխավոր դատախազը: 

Հոկտեմբերի 14­ին 14:00­ի սահմաններում Գյումրու Ալեք Մանուկյան փողոցի հատվածում տեղի էր ունեցել ավտովթար, որին հաջորդել էր վիճաբանություն: Խոսակցությունների համաձայն՝ դեպքի վայրում հնչել էին նաեւ կրակոցներ, սակայն իրավապահները հերքել էին կրակոցների մասին տեղեկությունները:

Քրեական գործը հարուցվել է ՀՀ ոստիկանության «Մուշի» բաժնի աշխատակցի զեկուցագրի համաձայն: Դեպքի վայրում հայտնաբերվել է գազային ատրճանակի չկրակված 4 փամփուշտ, վնասված մեքենաներ: Հարուցվել է քրեական գործ ՀՀ քրեական օրենսգրքի 258 հոդվածով: Ըստ տեղեկությունների դեպքը սկսվել է ավտովթարից: Կասկածվողների մի մասը բերման է ենթարկվել: