«Բոլոր տեղերը, որտեղ աշխատում եմ, ինձ լավ եմ զգում». Ներքին անվտանգության վարչության պետ Արմեն Հակոբյան

ՀՀ ոստիկանապետ Վլադիմիր Գասպարյանը շարունակում է Վանո Սիրադեղյանի ոճով աշխատել. համակարգի ներսում տեղափոխություններ է կատարում, դրանով իսկ թուլացնելով պաշտոնյաներին, կամ թույլ չտալով լիակատարորեն ու անվերադարձ հիմունքներով միաձուլվել սեփական աթոռին: Ճանապարհային ոստիկանության նախկին պետ Արմեն Հակոբյանի պարագայում այդպես է, թե՝ ոչ, դժվար է ասել: Արմեն Հակոբյանը ՃՈ պետի պաշտոնում աշխատեց ավելի քան մեկ տարի: Մինչ այդ՝ նա զբաղեցնում էր Ոստիկանության ներքին անվտանգության վարչության պետի պաշտոնը: 2016 թվականի հոկտեմբերին՝ ոստիկանապետը նրան ազատեց ՃՈ պետի պաշտոնից և նոյեմբերին կրկին նշանակեց Ներքին անվտանգության վարչության պետի պաշտոնում: ԼՈՒՐԵՐ.com-ի հետ զրույցում Արմեն Հակոբյանը նշեց, որ իր վերադարձը նախկին պաշտոնին՝ Վլադիմիր Գասպարյանի որոշումն է եղել:  

«Ոստիկանության պետն այդպես է որոշել, այդպես էլ եղել է»,-հակիրճ պատասխանեց Հակոբյանը: Հարցին՝ Ճանապարհային ոստիկանությունում իրեն լավ չէ՞ր զգում, ՆԱՎ պետն ասաց. «Բոլոր տեղերը, որտեղ աշխատում եմ, ինձ լավ եմ զգում: Սա ծառայություն է, կամավոր հիմունքներով չէ: Որտեղ նշանակում են, այդտեղ էլ ծառայում ենք»: 

Հակոբյանը նշեց, որ իր մեկ տարվա բացակայությունից հետո Ներքին անվտանգության վարչությունում ոչ մի նոր խնդիր չի առաջացել: «Հիմնարկն իր բնականոն հունով շարունակում է աշխատել»,- եզրափակեց Արմեն Հակոբյանը: 

Նշենք, որ Հակոբյանը Ներքին անվտանգության վարչության պետի պաշտոնում առաջին անգամ նշանակվել է 2011 թ. նոյեմբերի 7-ին՝ ոստիկանության պետի հրամանով, ապա՝ 2015 թ. հուլիսի 2-ին նշանակվել է ՀՀ ոստիկանության ճանապարհային ոստիկանություն ծառայության պետի պաշտոնին: 

Մինչ Արմեն Հակոբյանի վերադարձը ներքին անվտանգության վարչություն, վարչության պետը փոխգնդապետ Վահե Հարությունյանն էր, ով նախկինում աշխատել է դատախազությունում, այնուհետեւ ՀՀ ոստիկանության՝ կազմակերպված հանցավորության դեմ պայքարի գլխավոր վարչությունում:

Քրիստինա Աղալարյան