«Նաիրիտ»-ը սննկացրել են առողջացնելու համար. գործարանի տնօրենի զավեշտալի պատասխանները

Արդեն տեղեկացրել ենք, որ երկու օր առաջ՝ նոյեմբերի 28-ին՝ Շենգավիթ վարչական շրջանի ընդհանուր իրավասության դատարանում տեղի է ունեցել «Նաիրիտ» գործարանի սնանկության գործով արագացված դատական նիստ: Ի դեպ՝ նիստն ի սկզբանե նշանակված է եղել 2017 թվականի հունվարի 25-ին: Դատարանը որոշել է ՀԷՑ-ի հայցի հիման վրա գործարանը սնանկ ճանաչել: 

Ըստ դատական ակտի՝ որոշվել է «Նաիրիտ գործարան» ՓԲԸ-ից՝ հօգուտ «Հայաստանի էլեկտրական ցանցեր» ՓԲԸ-ի, բռնագանձել 500.000 ՀՀ դրամ՝ որպես դիմողի կողմից նախապես վճարված պետական տուրքի գումար, և այն որպես դատական ծախս գրանցել «Սնանկության մասին» ՀՀ օրենքի 82-րդ հոդվածի 1-րդ մասով նախատեսված «դ» հերթում, որը պետք է մարվի պարտապանի միջոցներից։ Վճիռն օրինական ուժի մեջ է մտնում կայացման պահից և կարող է բողոքարկվել ՀՀ վերաքննիչ քաղաքացիական դատարան՝ 15 օրվա ընթացքում։

Ուշագրավ է, որ նման վճիռ է կայացվել այն ժամանակ, երբ եվրոպական ընկերության կողմից ներկայացվել էր առաջարկ՝ «Նաիրիտ»-ը վերագործարկելու համար, Էներգետիկայի նախարարության կողմից հայտարարվել էր մրցույթ՝ մինչև 2017թ.-ի հունվարի 20-ը առաջարկներ ներկայացնելու պայմանով և հանկարծ՝ օգտագործում են Սամվել Կարապետյանի ազդեցությունը «ՀԷՑ»-ի ներկայիս ղեկավարության նկատմամբ՝ «Նաիրիտ»-ը շտապ կարգով սնանակացելու գործում:

ԼՈՒՐԵՐ.com-ի հետ զրույցում գործարանի ներկա տնօրեն Ռուբեն Սաղաթելյանն ասաց, որ նորմալ է ընդունում դատարանի որոշումը: Տնօրենը գործարանի սնանկության վերաբերյալ մեր հարցերին քմծիծաղով էր պատասխանում: «Սնանկացումը նաև նախատեսում է առողջացման ծրագիր: Սնանկ ճանաչելը գործարանի առողջացման ուղիներից մեկն է»,- ասաց նա: 

Ըստ նրա՝ բնական է, որ դատական նիստը տեղի է ունեցել արագացված կարգով և օրը փոխվել է. «Ժամկետներն ինչ կապ ունեն»: Տնօրենը նշեց, որ ինքը հույս ունի, որ սրանից հետո գործարանի առողջացման ծրագիր են մշակելու: 

Իսկ ահա գործարանի նախկին տնօրեն Կարեն Իսրայելյանն այլ կարծիք ունի գործարանը սնանկ ճանաչելու և դատական նիստը արագացված կարգով անելու վերաբերյալ: 

«Սա դեռ ոչինչ չի նշանակում: Մենք երկու տարուց ավել պայքարում ենք «Նաիրիտ»-ի համար, և, կարելի է ասել, բավական հաջողություն ենք ունեցել: Եթե չլիներ նաիրիտցիների պայքարը, նրանք վաղուց էին «Նաիրիտ»-ը սնանկ ճանաչել: Երևի պարզ է, թէ ինչու են դատը փոխել ու առաջ գցել: Դրան միայն մի պատճառ կա՝ մեզանից են վախեցել, քանի որ մենք միշտ մասնակցել ենք դատերին: Այսինքն՝ առ այսօր մենք մեզանից ուժ ենք ներկայացրել և մեր պայքարի թափը եթե չգցենք, այս որոշումը կմնա թղթի վրա և իրականություն չի դառնա: Մի մոռացեք, որ կա ներդնող, և նա պատրաստ է մեր հետ միասին պայքարել «Նաիրիտ»-ի վերաթողարկման համար»,-տեսակետ հայտնեց Իսրայելյանը: 

Նա դիմեց մինչ այս պահը պայքարող և չպայքարող նաիրիտցիներին. «Փորձեք համախմբել ձեր շուրջ նաև հուսահատվածներին, եկել է հարցի վերջնական լուծման ժամանակը: Մինչև հունվարի 20-ը բան չի մնացել: Պետք է ամեն ինչ անել, որ մրցույթը կայանա: Այդ ժամանակ, վստահ եմ՝ էլ պատճառներ չեն կարող բերել և «Նաիրիտ»-ը հաստատ կաշխատի»: 

Քրիստինա Աղալարյան