ԵՊՀ Ռադիոֆիզիկայի ֆակուլտետի դեկանն՝ ընդդեմ Հայաստանի

Մարդու իրավունքների եվրոպական դատարանը «Վարդանյանն ու Նանուշյանն ընդդեմ Հայաստանի» գործով Հայաստանի դեմ վճիռ հրապարակելուց հետո հայտնի դարձավ, որ ՀՀ Վճռաբեկ դատարանի նախագահ Արման Մկրտումյանը խախտել է մարդկանց մի շարք իրավունքներ: Դիմումատուները ՄԻԵԴ-ին ներկայացրել են, որ Մկրտումյանը փորձել է Բուզանդի փողոցում իրենց գույքը պահանջողին և գործով պատասխանողին պարտադրել, որ հաշտության գան: Իսկ Բուզանդ փողոցում գտնվող նրանց տները գերակա շահ էին ճանաչվել: Բնակիչներին փոխհատուցվել էր ընդամենը 54,494,000 դրամ, այնինչ՝ նրանց հավաստմամբ, իրենց տների իրական արժեքը 276,230,000 դրամ էր:

Եվրոպական դատարանը վճռել է, որ տեղի է ունեցել իրավական որոշակիության և իրավահավասարության սկզբունքի, արդար դատավարության իրավունքի խախտում և անօրինական կերպով սեփականության իրավունքից զրկում: Վճռի համաձայն՝ Հայաստանի դատարանները խախտել են վերջնական եզրակացությունների սկզբունքը, իսկ Վճռաբեկ դատարանի քաղաքացիական պալատի նախագահն անաչառ չի եղել:

Մի խումբ փաստաբաններ դիմել են Հայաստանի հանրապետության Դատավորների ընդհանուր ժողովի էթիկայի և կարգապահական հարցերի հանձնաժողովին՝ պարզելու՝ դատավորի նկատմամբ կարգապահական վարույթ հարուցվե՞լ է, թե՞ ոչ: Փաստաբան Տիգրան Աթանեսյանը ԼՈՒՐԵՐ.com-ի հետ զրույցում ասաց, որ 3-4 օրվա ընթացքում կպատասխանեն կամ չեն պատասխանի: Այս պահի դրությամբ՝ դեռ նորություն չունեն: 

ԼՈՒՐԵՐ.com-ին հայտնի դարձավ, որ ՄԻԵԴ դիմողներից Յուրի Վարդանյանը Երևանի պետական համալսարանի Ռադիոֆիզիկայի ֆակուլտետի դեկանն է, ՀՀ ԳԱԱ թղթակից անդամ: Մյուս դիմումատուն՝ Արտաշես Վարդանյանը՝ Յուրի Վարդանյանի որդին է՝ ռադիոֆիզիկայի և հեռահաղորդակցության ամբիոնի ասիստենտը, իսկ երրորդ դիմումատուն՝ Շուշանիկ Նանուշյանը, նույն ֆակուլտետի դասախոս Հրանուշ Նանուշյանի ազգականն է, չճշտված տեղեկություններով՝ քույրը:

Մեզ հետ զրույցում ֆակուլտետի դեկան Յուրի Վարդանյանը հրաժարվեց մեկնաբանել ՄԻԵԴ-ի որոշումը՝ պատճառաբանելով, որ վճիռը դեռ ուժի մեջ չի մտել: Նշենք, որ Եվրադատարանի վճիռն ուժի մեջ է մտնում երեք ամիս հետո, իսկ այդ ընթացքում կողմերը հնարավորություն են ունենում բողոքարկելու վճիռը: Վճռաբեկ դատարանի դատավոր Արման Մկրտումյանի կատարած խախտումների վերաբերյալ՝ ֆակուլտետի դեկանն ասաց. «Դե եթե նման որոշում է կայացրել, ուրեմն խախտվել է, չէ՞ մեր իրավունքները: Այս պահին չեմ ցանկանա մեկնաբանել եվրոպական դատարանի վճիռը: Ուժի մեջ մտնելուց հետո՝ միգուցե խոսեմ, մեկնաբանեմ»:

Յուրի Վարդանյանը դեկանի պաշտոնը զբաղեցնում է 1975 թվականից, նա եղել է ռադիոֆիզիկայի ֆակուլտետի միակ դեկանը: 

Ի դեպ՝ ՄԻԵԴ-ի որոշումը միջանկյալ է: Այն հնարավորություն է տալիս կողմերին՝ Հայաստանի կառավարությանն ու դիմումատուներին, համաձայնության գալ։ Համաձայնությունը չկայանալու դեպքում Եվրոպական դատարանը կորոշի փոխհատուցման չափը։

Քրիստինա Աղալարյան