«Հաց բերողն» ունի կալանքի հետ անհամատեղելի հիվանդություն. փաստաբանն ահազանգում է

Այսօր Արթուր Սարգսյանի՝ «հաց բերողի» պաշտպանները, տարածեցին հայտարարություն այն մասին, որ ՄԻԵԴ-ը կառավարությունից պարզաբանումներ է պահանջել Արթուր Սարգսյանի առողջական վիճակի վերաբերյալ:

ԼՈւՐԵՐ.com-ի հետ զրույցում վերոնշյալ գործով զբաղվող փաստաբաններից Դավիթ Գյուրջյանը տեղեկացրեց, որ իրենք դիմել են ՄԻԵԴ, քանի որ Արթուր Սարգսյանը պահվում էր անմարդկային պայմաններում, իսկ նրա առողջական վիճակը պարտադրում էր դիմել հրատապ քայլերի: Մեր հարցադրմանն՝ ինչ ի նկատի ունի պաշտպանը՝ անմարդկային պայմաններ ասելով, նա պատասխանեց. «Խոսքը, մասնավորապես, վերաբերում է Սարգսյանի պահման պայմաններին, որոնք բավարար չեն նման առողջական լուրջ խնդիրներ ունեցողների պահման համար: Նշեմ, որ նրա հիվանդություններից մեկն, օրենքով, կալանքի հետ անհամատեղելի է, բայց նույնիսկ այդ որոշումից հետո նրան շարունակում են պահել նույն պայմաններում: Արթուր Սարգսյանին քաղաքացիական հիվանդանոց չտեղափոխելն անմարդկային է»:

Ըստ Գյուրջյանի՝ ՄԻՊ-ի այցից հետո Արթուր Սարգսյանին տվել են փոխարինող դեղահաբեր և նրան ցուցաբերվող բուժօգնությունը սահմանափակվել է այսքանով:

«Մենք բոլոր քայլերը ձեռնարկում ենք այն ուղղությամբ, որ Սարգսյանն ազատ արձակվի և քաղաքացիական հիվանդանոցում ստանա իր հետագա բուժումը»,-ասաց պաշտպանը:

Հարցին՝ առողջապահության նախարարությունն արձագանքե՞լ է տարածված հայտարարությանը՝ հաշվի առնելով այնտեղ նշված հիվանդությունների ցանկն ու հրատապ բուժման անհրաժեշտությունը, փաստաբանը պատասխանեց. «Մինչ այս պահը որևէ արձագանք չի եղել»:

Հիշեցնենք, որ Արթուր Սարգսյանը տառապում է «Բեխտերևի» հիվանդությամբ, ունի որովայնային գծային ճողվածք, իսկ ողնաշարի վիրահատության ընթացքում C1 և C2 մասնահատում է կատարվել եւ պրոթեզավորվել: Նա երկրորդ կարգի զինվորական հաշմանդամ է։ Կալանքի տակ գտնվելու ընթացքում Արթուր Սարգսյանի մոտ ախտորոշվել են նաեւ այլ հիվանդություններ, և նրա վիճակը ծայրահեղ սրվել է: 

Աղավնի Սուքիասյան